VIQUEQUE, 15 jullu 2023 (TATOLI) – Ponte iha área Suku Uma-Tolu, Postu Administrativu Lacluta, Munisípiu Viqueque ne’ebé kotu fó impaktu ba atividade negosiante sira nian.
Xefe Suku Dilór, Postu Lacluta, Jacinto Ximenes, esplika ponte ne’ebé kotu, negosiante sira ho karreta labele liu no karreta para de’it iha mota sorin maka sosa sasán sira hanesan nesesidade báziku.
“Impaktu udan boot halo ponte kotu, agora sai difikuldade boot ba ami-nia populasaun sira tenke ba sosa sasán husi dook maka foin lori fila ba uma tanba ita-nia negosiante sira ho karreta labele liu ponte nune’e sira faan sasán ba konsumidór sira iha Ponte Lacluta”, Autoridade Suku Dilór, ba Agência Tatoli, liuhosi telephone, sábadu ne’e.
“Ha’u haree sai problema boot ba ami tanba foos Globos 20 kilo, saka ida agora folin sa’e ba $20, uluk ne’e folin $14. Depois ponte ne’e kotu mak folin sa’e, la’ós negosiante sira maka hakarak sa’e folin foos ne’e”, nia hato’o.
Aleinde ne’e, nia dehan, kazu moras emerjénsia ruma iha, karreta ambulánsia labele halo transferénsia pasiénte ba munisípiu no munisípiu mós labele tama Postu Lacluta.
Ho ida-ne’e, nia fó hanoin ba Governu presiza rezove ponte ne’e ho emerjénsia atu labele difikulta populasaun Postu Lacluta nian movitmentu sira.
Kona-ba ponte ne’e, autoridade lokál sira hato’o ona ba munisípiu no nasionál, maibé seidauk iha resposta ruma hodi halo normalizasaun ba Ponte Uma-Tolu.
“Ponte ne’e kotu, ami relata hotu ona ba parte relevante no horseik maka ekipa servisu obra públika munisípiu mai hodi ami hasoru malu iha ponte, maibé sira halo levantamentu dadús. Ha’u nudar autoridade lokál hakarak husu Governu sentrál imediatamente halo normalizassun ba ponte ne’e atu labele fó impaktu ba negosiante ambulante sira no mós movimentu sira seluk”, nia sujere.
Ponte ne’ebé kotu lokaliza iha Suku Uma Tolu, liga ba Postu Lacluta ho suku haat mak hanesan Ahik (Ahic), Dilor, Laline ho Uma Tolu. Ho totál Populasaun 5.853, (sensus populasaun 2010).
Jornalista: Vitorino Lopes da Costa
Editór : Zezito Silva
