ADB kontinua apoiu dezenvolvimentu Timor-Leste
DILI, 17 jullu 2023 (TATOLI)—Prezidente Parlamentu Nasionál (PPN), Maria Fernanda Lay, segunda ne’e simu audénsia ho Country Diretór hosi Banku Dezenvolvimentu Asiátiku (ADB, siglá inglés) ba Timor-Leste, Estefania Dina, hodi ko’alia serbisu ADB ne’ebé durante ne’e kontinua fó apoiu ba dezenvolvimentu iha Timor-Leste.
“Iha enkontru ho Prezidente Parlamentu ami ko’alia barak kona-ba iha momentu dezenvolvimentu saida mak di’ak ba iha nasaun ne’e, ami fahe hanoin ba malu liu-liu kona-ba oinsá hanesan serbisu ADB nian hodi apoiu nasaun ida-ne’e,” Country ADB, Estefania Dina, hateten ba jornalista sira hafoin ramata enkontru ho Prezidente Parlamentu Nasionál iha PN.
Nia dehan, serbisu sira-ne’ebé ADB durante ne’e apoiu ba Timor-Leste iha setór infraestrutura hanesan bee-moos, estrada, setór transporte sira seluk hanesan agrikultura, diversifikasaun konómika no sira seluk, nune’e mós apoiu Timor-Leste nia prosesu adezaun ba ASEAN.
Mezmu nune’e, Country Diretór ADB ne’e la esplika detallu espesífiku kona-ba apoiu ADB nian iha setór sira-ne’e.
Durante sorumutu, Country Diretór ADB ne’e mós introdús ba Prezidente Parlamentu Nasionál hanesan Country Diretór ADB foun ba Timor-Leste.
“Ohin, ha’u nu’udar Country Diretór foun ADB nian mai iha Timor-Leste, ohin hanesan kortéjia ho Prezidente Parlamentu Nasionál, enkontru ne’e hanesan mai introdús ha’u-nia an tanba ha’u foin to’o mai,” nia dehan,
Jornalista : Nelson de Sousa
Editór : Cancio Ximenes
