iklan

EKONOMIA, HEADLINE, MUNISÍPIU, OÉ-CUSSE (RAEOA)

Autoridade hala’o serimónia kulturál molok ezekuta estrada nasionál Tono ba Oésilo

Autoridade hala’o serimónia kulturál molok ezekuta estrada nasionál Tono ba Oésilo

Autoridade hala’o serimónia Kulturál molok ezekuta estrada nasionál Tono ba Oésilo. Imajen Tatoli/ Abílio Elo Nini.

OÉ-CUSSE 17 jullu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk komunidade sira no kompañia Waskita Karya, segunda ne’e hala’o serimónia kulturál realiza iha Banotoe, suku Cunha, sub-rejiaun Pante Makasar, hodi hahú ezekusaun konstrusaun estrada nasionál hosi Tono ba sub-rejiaun Oésilo.

“Ohin simbolikamente ita halo serimónia rituál hato’o ba rai na’in-sira iha fatin Banotoe, tanba fatin ne’e ema Oé-Cusse barak, rekoñese fatin ne’e sagrada, entaun ita presiza hato’o ba rai na’in-sira tanba foho oan ne’e presiza fera, entaun ohin ne’e mai husu lisensa atu tulun ita, ba prosesu kontrusaun ne’e bele la’o ho susesu,”Arsénio Bano informa ba jornalista sira.

Notísia relevante: Estrada nasionál Tono ba Oésilo seidauk hahú

Arsénio Paixão Bano, informa, kostume kulturál ne’e nu’udar responsabilidade koletiva autoridade komunidade no kompañia, hodi husu matak malirin, nune’e bainhira iha implementa bele la’o ho susesu, no kompañia mós prepara estrada alternativa liuhosi mota Tono hosi eis merkadu to’o liu ba suku Naimeko.

“Provizoriamente suku Bobokase, bairru Nusla’o, sei taka tanba projetu hahú la’o entaun dalan alternativa liuhosi mota de’it,” nia katak.

Fatin hanesan, Jestór projetu Waskita Karya ba projetu estrada Tono Oésilo, Aristomo, hateten, ba materiál konstrusaun, daudaun ne’e kompañia halo ona mobilizasaun hosi nasaun Indonézia, balu hosi Dili no balu sei koordena ho ekipa pakote I iha projetu estrada nasionál hosi ponte Noefefan liga sub-rejiaun Nítibe.

“Ohin ita hahú servisu dahuluk ba konstrusaun estrada ne’e, hahú hosi Tono, ita hahú haluan estrada tanba hosi Tono ba Oésilo kilómetru 17, tán ne’e ohin ita hahú ho serimónia kulturál atu husu lisensa ba lulik sira hotu atu ita servisu hetan matak malirin, nune’e projetu ne’e bele la’o ho di’ak kualidade no tuir tempu kontratu,” nia katak.

Entretantu, kompañia Internasionál PT Waskita Karya, ezekuta projetu estrada nasionál ne’e sei hahú hosi eis merkadu Tono, suku Cunha, sub-rejiaun Pante Makasar sei to’o fronteira Napan, suku Bobometo, sub-rejiaun Oésilo ho distánsia kilómetru 17.

Valór kontratua projetu ne’e hamutuk $33,915,000.00 (millaun $33-resin),  orsamentu ne’e  Autoridade RAEOA prevee hosi Orsamentu Jerál Estadu (OJE) 2023 nian, ho durasaun servisu durante tinan rua.

 Nótisia relevante: Komunidade promete fó kontribuisaun ba projetu estrada Oésilo

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!