DILI, 17 jullu 2023 (TATOLI) – Ekipa konjunta kompostu hosi Polísia Nasionál Servisu Investigasaun Kriminál (PNSIK) Autoridade Aduaneiru (AA/ Alfándega) halo apreensaun ba sigaru ilegál hamutuk saku ualu iha área Portu Tibar, Munisípiu Liquiça, ne’ebé mak sidadaun balun tenta lori hosi Batugade atu mai faan iha Díli.
Sasan kontra bandu sira ne’e lori hosi sidadaun na’in-tolu ho insiál JS, JB no MI. hirak ne’e importa sasan ilegál lori hosi Batugade Postu Administrativu Maliana, Munisípiu Bobonaro hodi mai faan iha Díli laran.
Bainhira sidadaun sira ne’e to’o iha área Portu Tibar, ekipa konjunta simu informasaun tún kedan ba fatin referidu ho rápidu no ekipa deteta no halo kedan apreensaun ba sasan sira ne’e iha tuku 14:00 loraik.
“Ami halo apreensaun ba sigaru ilísitu hamutuk karon ualu iha Portu Tibar, tanba sasan sira ne’e komete merkadoria ilísitu”, Diretór Nasionál Konformidade Autoridade Aduaneiru (AA/ Alfándega), Ivo Gomes dehan ba jornalista sira iha Palásiu Governu, segunda ne’e.
Ivo Gomes esplika, sigaru ne’ebé mak ekipa konjunta halo apreensaun mak sigaru ho marka Pohon Sagu hamutuk saku haat, Sigaru Tembakau ho saku tolu no Suriya 12 ho saku ida, iha saku laran hamtuk 21 slop.
“Sasan sira ne’e ami konsidera kontra bandu ka merkadoria ilísitu no ami halo apreensaun ba sasan sira ne’e, tanba viola Dekretu-Lei Númeru 14/2016 rejime kontrolu tabaku”, nia dehan.
Tanba, hosi artigu 9 no 10 iha dekretu-lei rejime tabaku ne’e hateten, singaru ne’ebé atu tama Timor-Leste tenke hetan autorizasaun hosi Ministériu Saúde.
Sigaru ne’ebé importa mai Timor-Leste ninian nikotina tenke menus hosi 1ml, karbon monozida tenke menus hosi 10mg ninian no tar tenke menus hosi 1mlg.
“Maibé sigaru sira ne’ebé mak ohin ita halo apreensaun ne’e, ami konsidera hanesan la priénse rekezitu, tanba ne’e, ami konsidera hanesan kategoria sasan kontra bandu”, Ivo Gomes adianta.
Hafoin ekipa konjunta halo tiha apreensaun ba sasan sira ne’e, lori kedan ba edifísiu Alfándega iha Palásiu Governu no Alfánga halo kedan nota entrega hodi entrega ba PNSIK hodi kontinua prosesa.
Entratantu, sidadaun ne’ebé hanesan na’in ba sasan evidente sira ne’e, parte PNSIK lori kedan ba Departamentu Investigasaun Kriminál (DIK) Komandu Jerál PNTL hodi submete ba prosesu identifikasaun.
Jornalista: Natalino Costa
Editór : Zezito Silva
