Lista idozu-invalidés foun hosi Bobonaro submete ona ba INSS
MALIANA, 17 jullu 2023 (TATOLI) – Diretór Sentru Solidariedade Sosiál iha Munisípiu Bobonaro, Francisco Tilman, fó-sai katak, lista idozu no invalidés foun hamutuk na’in-562 submete ona ba Institutu Nasionál Seguransa Sosiál (INSS).
Nia subliña, dadus ne’e rekolla iha fulan tolu komposta hosi abríl, maiu no juñu tinan 2023 ne’ebé foin lalais ne’e aprovadu ona iha munisípiu no dokumentu kompletu.
“Ita-nia dadus idozu no invalidés sira ne’e porvolta 562 aprovadu no haruka ona ba Dili iha semana kotuk, atu nune’e INSS bele halo análize ba dokumentu no aprova hodi nune’e bele submete ba iha Banku Sentrál,” nia informa ba jornalista sira, iha Maliana, segunda ne’e.
Hosi númeru ne’e iha dadus pendente kauze 20-resin razaun tanbá sira-nia dokumentu seidauk kompletu.
“Sira prosesu fali dukumentu mak foin ita manda fali ba, ne’ebé dukumentu semana rua ita manda ba iha nasionál, ohin dadeer ha’u ba ona Notariadu konfirma ho ferik-katuas sira, obrigatóriu hakarak ka lakohi sira tenke trata dokumentu halo kompletu, liuliu Billete Identidade (BI),” nia akresenta.
Dadus ne’ebé iha benefisiáriu idozu no invalidés iha munisípiu Bobonaro besik rihun ualu. Hosi númeru ne’e barak liu mak postu administrativu Bobonaro, Cailaco, Maliana, Balibo, Atabae no postu administrativu Lolotoe.
Francisco Tilman, dehan tuir loloos prosesu pagamantu sei akontese iha fulan-jullu, maibé agora depende ba governu foun nia planu.
“Ita hein loron 120 ne’e siada maka sira prepara, depois sira prepara hotu bele fó-sai ona data fiksu, tanba ha’u hanoin katak lei orgánika konsellu ministeriál ne’e remata ona, depois hodi hein fali lei orgánika ministériu idak-idak nian hafoin bele fó-sai data fiksu,” nia dehan.
Diretor ne’e apela ba inan-aman sira-ne’ebé atinje ona idade 60 atu prepara no trata dokumentu sira hanesan BI, kartaun eleitorál, sertidaun RDTL no dikumentu hosi Igereja nune’e la difikulta prosesu pagamentu.
Jornalista : Sérgio da Cruz
Editór : Evaristo Soares Martins
