PDHJ husu TR halo fiskalizasaun abstrata ba Estatutu PNTL
DILI 17 jullu 2023 (TATOLI) – Prevedoria Diretu Humanus Justisa (PDHJ), husu Tribunál Rekursu (TR) atu halo fiskalizasaun abstrata hodi proklama inkonstituisionalidade ba Dekretu-Lei númeru 69/2022, 22 setembru kona-ba estatutu Polísia Nasionál Timor-Leste (PNTL), tanba dekretu lei ne’e, PDHJ konsidera viola espiritu Konstituisaun Repúblika Demókratiku Timor-Leste (K-RDTL) artigu 50.
Prevedór PDHJ, Vírgilio Guterres hateten, PDHJ simu keixa hosi Ofisiál PNTL reformadu sira, iha keixa ne’e, membru reformadu sira fundamenta katak reforma ne’ebé Governu halo liuhosi Komandu PNTL tuir Estatutu PNTL la tuir prosedimentu legál.
Tanba ne’e, hafoin PDHJ simu tiha keixa, PDHJ halo kedan pareser ba estatutu PNTL ne’e tuir artigu 150 no 151 hosi Konstitusaun RDTL.
Tuir artigu 150 no 151, fó dalan ba PDHJ bele halo pareser ba lei ruma ne’ebé Governu halo mak ho espiritu kontra KRDTL, PDHJ bele halo pedidu liuhosi halo pareser ba Tribunál hodi halo fizkalizasaun abstrata ba dekretu–lei, hodi deklara inskonstuisonalidade.
“Hofoin PDHJ liuhosi nia asesoria jurídika haree no analize, hodi fó-nia pareser Dekretu-Lei númeru 69/2022, 22 setembru kona-ba estatutu PNTL ne’ebé fó biban ba membru PNTL atu reforma, ne’e kontra espiritu Konstituisaun artigu 50 kona-ba direitu ou liberdade atu hetan servisu”, Prevedór Vírgilio Guterres, ba jornalista sira hafoin hasoru malu ho Prezidente Tribunál Deolindo dos Santos, ba jornalista iha TR, Caicoli, segunda ne’e.
Nia esplika, kualker dekretu-lei ruma atu fó biban ba ema atu reforma ne’e tenke hetan aseitasaun hosi Parlamentu Nasionál mak foin ba Governu hodi halo reforma ba ema ida.
“Konstituisaun hateten katak desizaun atu hapara ema ka atu limite ita-nian liberdade ou hapara ema nian servisu ne’e, tenke kompeténsia mai hosi Parlamentu, la’os Governu nia kompeténsia, Governu bele halo lei ne’ebé ke koalia kona-ba asuntu ida ne’e, maibé tenke hetan autorizasaun hosi Parlamentu”, Vírgilio afirma.
“PDJH konsidera estatutu PNTL ne’ebé fó biban ba membru PNTL atu reforma, la’os lei ne’ebé ke hetan autorizasaun hosi Parlamentu, tanba ne’e organikamente inkonstitusionál”, nia adianta.
Maske nune’e, Prevedór Direitus Humanus Justisa ne’e salienta, atu deklara inkonstitusionál ne’e só kompetensia Supremu Tribunál Justisa, PDJH só hato’o pedidu pareser ba Tribunál. Tanba PDJH haree katak estatutu PNTL ne’e kontra espiritu Konstituisaun.
“Husu ba Tribunál hodi proklama ninian inkonstitusinalidade, maske lei ne’e entra no vigór ona, maibé tuir Konstitusaun Tribunál mak iha kompeténsia halo fizkalizasaun abstrata hodi inkonstitusionalidade ba estatatu PNTL nian”, nia konklui.
Jornalista: Natalino Costa
Editór : Zezito Silva
