iklan

MUNISÍPIU, SAÚDE, VIQUEQUE

Postu saúde Ratahau Viqueque rejista moras ISPA hamutuk 500

Postu saúde Ratahau Viqueque rejista moras ISPA hamutuk 500

Postu saúde Ratahu. Imajen Tatoli/Vitorino Lopes da Costa

VIQUEQUE, 17 jullu 2023 (TATOLI)—Postu saúde Ratahu, suku Uma Uain Kraik, postu Viqueque Vila, munisípiu Viqueque rejista moras Infesaun Vias Respiratória (ISPA) hamutuk 500 iha janeiru to’o jullu.

Responsavél postu saúde Ratahu, Armindo Miranda, hateten, moras ISPA ho númeru a’as tanba kauza hosi rai-rahun.

“Ami kada loron halo atendimentu ba komunidade iha área Ratahu, durante ne’e ami rejista kazu ISPA maka barak liu kompara ho moras sira seluk, tanba iha tempu hanesan loron manas ne’e mosu rai-rahun, depois ita-nia komunidade la taka máskara ruma nune’e fó impaktu ba saúde,” Armindo Miranda informa iha postu saúde Ratahu, segunda ne’e.

Notísia relevante : Postu saúde Ulusu Viqueque rejista moras ISPA 284

Bainhira pasiente sira halo tratamentu, pesoál saúde sira fó aimoruk paracetamol no amoxilin.

“Stoke ai-moruk iha postu saúde uluk sempre menus, maibé agora daudaun ami sente di’ak ona tanba stoke ai-moruk sufisente hela hodi fó tratamentu ba komunidade,” nia akresenta.

Tuir dadus, moras kulit rejistadu iha postu saúde hamutuk 30 hahú janeiru to’o jullu. Atendimentu hahú segunda to’o sesta, kada loron pasiente na’in-20 to’o 30 mak vizita postu saúde.

Pesoál saúde hamutuk na’in-haat mak servisu iha postu saúde ne’e, kompostu hosi enfermeiru na’in-rua no saúde públika na’in-rua, hodi fó atendimentu ba abitante sira iha suku Uma Uain kraik.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!