PPN-Rede Feto diskute kooperasaun serbisu kona-ba advokásia asuntu feto
DILI, 17 jullu 2023 (TATOLI)—Prezidente Parlamentu Nasionál (PPN), Maria Fernanda Lay, segunda ne’e simu audiénsia hosi Prezidente Rede Feto Timor-Leste, Zélia Fernandes, ho estrutura hodi diskute kona-ba kooperasaun serbisu iha lejislatura daneen liuliu ba advokásia asuntu feto nian.
“Ko’alia barak liu kona-ba kna’ar ne’ebé mak Rede Feto Timor-Leste iha hanesan halo advokásia, ko’alia ho Prezidente Parlamentu oinsá mak ba futuru bele iha serbisu hamutuk ida di’ak liuliu oinsá ami bele trata ami-nia asuntu sira-ne’e diretamente ho komisaun espesializada ne’ebé estabelese iha Parlamentu Nasionál,” Prezidente Rede Timor-Leste, Zélia Fernandes, hateten ba jornalista sira hafoin ramata enkontru ho Prezidente Parlamentu Nasionál iha PN.
Nia hatutan, aleinde iha Grupu Mulher Parlamentár Timor-Leste (GMPTL) ne’ebé espesífiku liu sei iha kooperasaun besik liu ho Rede Feto Timor-Leste kona-ba gender response budgeting ne’ebé normalmente kada tinan Rede Feto submete no submisaun mai hamutuk ho nia membru sira, no la’ós de’it submisaun jerál maibé bele mós submisaun espesífiku ba asuntu espesífiku sira.
“Ida-ne’e mak ami ko’alia ho Prezidente Parlamentu Nasionál,” nia dehan.
Prezidente Rede Feto entrega mós ba PPN plataforma asaun feto Timor-Leste nian ne’ebé nu’udar dokumentu polítiku feto Timor-Leste ninian, ne’ebé prodús iha kongresu nasionál feto Timor-Leste kada tinan haat.
Nia informa,mós ba PPN kona-ba kongresu nasionál feto Timor-Leste daneen ne’ebé tuir planu sei hala’o iha tinan 2024 no sei atualiza polítika feto Timor-Leste.
“Ami hanoin katak, bainhira ko’alia kona-ba asuntu igualidade jéneru luta ba direitu feto nian, ami sei la haree ba kór, la haree ba grupu maibé luta ba igualidade jéneru luta ba direitu feto nu’udar luta konjunta ne’ebé feto hotu-hotu tenke hamutuk atu bele atinje igualidade jéneru no inkluzaun sosiál,” nia hateten.
Biban ne’e, Zélia Fernandes, agradese ba PPN ne’ebé simu sira-nia pedidu hodi bele hala’o enkontru refere no oportunidade ne’e Rede Feto Timor-Leste hamutuk ho membru sira hakarak kongratula Prezidente Parlamentu Nasionál.
Nia dehan, orgullu boot ida tanba dahuluk iha Timor-Leste iha feto ida okupa kna’ar Prezidente Parlamentu Nasionál, no estrutura PN iha lejislatura daneen maiória ne’ebé okupa hosi feto sira.
Nia hato’o ideia sira oinsá mak atu koopera no kontinua fó apoiu ba órgaun Estadu tomak hodi bele asegura prosesu dezenvolvimentu tomak iha nasaun ne’e.
Jornalista : Nelson de Sousa
Editór : Cancio Ximenes
