VIQUEQUE, 18 jullu 2023 (TATOLI)—Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P, sigla portugés) liuhosi Brigada Daitula Baucau destaka ona ekipamentu pezadu iha ponte Sumaku, iha suku Uma-Tolu, postu administrativu Lacluta, munisípiu Viqueque hodi normaliza ponte ne’ebé kotu, maibé ekipamentu mout iha mota.
“IGEADI, I.P destaka ekipamentu pezadu hodi bain-rua domingu (16/07), maibé ami sente triste tanba bainhira loader to’o iha mota Sumaku mout tiha no labele sai ba mota sorin. Agora kondisaun ne’e impede pasajeiru atu hakat ba mota sorin,” Administór postu Lacluta, José Anrade dos Santos, informa ba Agência Tatoli, iha resintu Administasaun munisípiu Viqueque, tersa ne’e.
Notísia relevante : Autoridade Lacluta husu Governu hadi’a ponte Uma Tolu Viqueque
Ekipa lori tan eskavadór ida ba Lacluta hodi hasai ekipamentu maibé horiseik mout tan.
“Tanba ne’e ha’u husu ba IGEADI, I.P no Ministériu Obra Públika (MOP) atu koloka tan ekipamentu pezadu ruma hodi hasai ekipamentu pezadu rua ne’ebé agora mout hela iha mota Sumaku. Ha’u hanoin se orsida maka udan-boot ne’e mota bele lori ekipamentu rua ne’e tanba roda sira mout hotu ona ba rai henek okos,” nia preokupa.
Tuir Autoridade postu, ekipamentu rua ne’ebé mout daudaun sai impedimentu ba movimentu komunidade Lacluta tanba labele liu mota Sumaku.
“Husu ba Governu tau medida sériu ba povu Lacluta nian sofrimentu sira-ne’e. Daudaun ami liu di’ak, maibé bainhira motorizada sira atu liu, ema tenke lalin motorizada ne’e ba mota sorin. Joven sira agora halibur malu hodi lalin motorizada, maibé tenke selu ba motorizada boot $10 no motorizada kiik $5. Ha’u haree karreta mak seidauk bele liu,” nia tenik.
Jornalista : Vitorino Lopes da Costa
Editora : Julia Chatarina
