DILI 17 jullu 2023 (TATOLI) – Komandante Polísia Nasionál Timor-Leste (PNTL), Superintendente Polísia, Umbelina Soares, informa PNTL Liquiça hamutuk ho Servisu Informasaun Polísia (SIP), halo apreensaun ba Kilat Manu hamutuk 21 ne’ebé sidadaun timoroan tenta hatama hosi Fronteira Indonézia mai Timor-Leste.
Kilat manu hirak ne’e suspeitu na’in-tolu ho inisiál MB, JMP no DA mak tula ho motor, hatama falun ho saku rua hodi hatama mai iha Timor-Leste iha segunda (17/7) horikalan.
Nia konta, bainhira suspeitu sira ne’e lori sasan kontra bandu tama mai hosi fronteira Batugade to’o mai Munisipiu Liquiça, Komandu PNTL hamutuk ho SIP simu informasaun, nune’e halo kedan intervensaun hodi halo apreesaun ba sasan sira ne’e.
“Sim, ne’e los, horikalan ami halo apreensaun ba sasan kontra bandu hanesan arma branka ho tipu kilat manu hamutuk-21, ne’ebé mak ita-nia suspeitu na’in-tolu tenta lori hosi fronteira atu mai iha Díli”, Superintendente Polísia, Umbelina Soares hateten ba Agência TATOLI, via-telefone, tersa ne’e.
Nia dehan, sasan kontra bandu hirak ne’e, parte Komandu PNTL Liquiça transporta ona ba Komandu Jerál PNTL Caicoli, hodi kontinua submete ba prosesu investigasaun.
“Agora ami atu transporta sasan ba Komandu Jerál PNTL”, Komandante Umbelina konklui.
Jornalista : Natalino Costa
Editór : Zezito Silva
