Rejistu Notariadu Kadastru Covalima identifika proprietáriu Estadu 100-resin
COVALIMA, 18 jullu 2023 (TATOLI)–Diretór Servisu Munisipal Rejistu Notariadu no Kadastru Covalima, Armindo Monteiro, hateten hahú fulan-janeiru to’o juñu tinan 2023 ne’e, Rejistu Notariadu no Kadastru identifika ona proprietáriu Estadu hamutuk 100-resin iha munisípiu Covalima.
“Hahú fulan-janeiru to’o fulan-juñu tinan 2023, Servisu Munisipal Rejistu Notariadu no Kadastru halo identifikasaun ba rai no proprietária Estadu liu ona trajetu. Tanba, ami-nia alvu tinan-ida identifika rai no uma Estadu parsela 80, maibé agora ami identifika 100-resin,” Diretór Servisu Munisipál Rejistu Notariadu no Kadastru, Armindo Monteiro hateten ba Agência Tatoli iha nia kna’ar fatin, tersa ne’e.
Bazeia ba meta Rejistu Notariadu no Kadastru tinan-ida identifika rai no proprietáriu Estadu hamutuk parsela 80 maibé durante fulan-neen de’it rejistu Notariadu no Kadastru identifika ona 100-resin
Maske identifika ona 100-resin, maibé nia hatun ona orientasaun atu kontinua hala’o identifikasaun proprietáriu Estadu iha postu administrativu Zumalai, Munisípiu Covalima hodi bele hatene tuir rai no proprietária ne’ebé abandona no sidadaun sira okupa hela.
Rejistu Notariadu no Kadastru Covalima hala’o servisu tuir baze legál dekretu-lei númeru 3/2017 altera ba númeru 54/2020 ko’alia kona-ba servisu Munisipál Rejistu Notariadu Covalima.
Tuir dadus, funsionáriu ne’ebé servisu iha Servisu Munisipál Rejistu Notariadu no Kadastru Covalima ne’e funsionáriu permanente hamutuk na’in-rua (2) no funsionáriu kazuál hamutuk na’in-neen (6).
Jornalista : Celestina Teles
Editór : Cancio Ximenes
