CNC, I.P rekolla reseita $6.973 ba kofre Estadu iha tinan 2022
DILI, 19 jullu 2023 (TATOLI)—Centro Nacional Chega, Institutu Públiku (CNC, I.P) konsege rekolla reseita $6.973 ba kofre Estadu, iha tinan 2022.
Bazeia ba relatóriu ne’ebé Agência Tatoli, asesu kuarta ne’e, CNC,I.P bele rekolla reseita tanba nu’udar ajénsia autónoma ida hahú angrariasaun fundu liuhusi utilizasaun fasilidade ka patrimómiu eziste nu’udar meiu ida hodi kontribui reseita ba Estadu husi setór naun petrolíferu.
Aleinde ne’e, iha ona termu referénsia ba implementasaun atividade jestaun reseita ne’ebé hetan ona aprovasaun hosi Diretór Ezekutivu no iha ona kódigu reseita, konta bankária, sekúensia númeru seriál resivu mak autoriza Ministériu Finansa (MF) no CNC, I.P iha ona user ID hodi rejista reseita iha sistema Governamment Resource Planning (GRP).
“Iha 2022, CNC,I.P depozita ona reseita hamutuk $6.973 ba kofre Estadu iha Banku Sentrál Timor-Leste (BCTL), ne’ebé osan sira ne’e mai husi atividade hanesan fa’an livru, hetan vizita hosi turista sira inklui aluga salaun,” refere relatóriu.
Jornalista : Arminda Fonseca
Editora : Julia Chatarina
