COVALIMA, 19 jullu 2023 (TATOLI)–Governu liuhosi Ministériu Saúde hamutuk ho Marie Stopes Internasionál Timor-Leste (MSI-TL) ne’ebé apoiu fundu hosi Governu Nova Zelandia realiza lansamentu programa ekipa baze Outreach iha Covalima.
“Ohin, iha Covalima marka istória foun ne’ebé kolaborasaun entre Ministériu Saúde hamutuk Marie Stopes Internasionál Timor-Leste (MSI-TL) durante ne’e iha ona akordu hahú iha tinan 2006 to’o ohin loron, hodi hala’o lansamentu ekipa baze Outreach iha munisípiu Covalima,” Diretora Jerál Prestasaun Servisu Ministériu Saúde, Odete da Silva Viegas, hateten ba jornalista sira, iha resintu kongregasaun Irmã Miserekordia,Santa Rosa, kuarta ne’e.
Ho nune’e, nia dehan, servisu ne’ebé MSI-TL presta hodi servisu hamutuk Ministériu Saúde (MS) hodi haree kona-ba saúde reprodutiva, saúde seksuál no planeamentu família ne’ebé hala’o ona iha munisípiu lubuk ida no ohin ikus iha munisípiu Covalima.
“Ba oin, ita hakarak haree liu servisu Outreach signifika katak hodi servisu hakbesik ba iha populasaun atu redús númeru moras no númeru mate ba inan no oan sira presiza haforsa iha medida preventiva, halo advokasia ba ita-nia komunidade no inan-aman sira oinsá sira bele entende diak servisu hodi fó obsesaun ba komunidade, ita sei la obrigada sira atu hili planeamentu familiar (keluarga berencana),” nia dehan.
Ministériu saúde mós hato’o agradese ba Governu Nova Zelandia fó apoiu ba MSI-TL hodi kontribui ba papél Ministériu Saúde ne’ebé sai prióridade importante ba iha Ministériu Saúde (MS).
Diretora MSI-TL, Amelia Barreto, hato’o agradesimentu Ministériu Saúde no Governu Nova Zelandia apoia ba Marie Stopes Internasionál Timor-Leste (MSI-TL) ne’ebé realiza lansamentu programa ekipa baze Outreach iha Covalima.
“Ami hato’o agradese ba Ministériu Saúde no Governu Nova Zelandia fó apoia ba Marie Stopes Internasionál Timor-Leste (MSI-TL) hodi realiza lansamentu programa ekipa baze Outreach signifika MSI-TL sei servisu hamutuk servisu saúde Covalima hodi halo atendimentu iha fasilidade saúde hodi halo tratamentu kona-ba planeamentu família,” nia dehan.
Tipu servisu husi MSI-TL sei fahe informasaun nune’e ekipa sei servisu hamutuk ho líder komunitáriu sira hodi hasee informasaun kona-ba planeamentu família oinsá ho nia benefisiu.
Programa baze Outreach MSI-TL implementa ona iha munisípiu hotu ne’ebé ohin hala’o lansamentu ikus iha Covalima.
Sekretáriu Administrasaun Munisípiu Covalima, Francisco de Jesus Alves, hateten serimónia lansamentu programa baze Outreach hosi MSI-TL ne’ebé durante ne’e implementa programa sira hanesan saúde reprodutiva, saúde seksuálxual no planiamentu família.
“Ohin, ita realiza lansamentu programa hosi MSI-TL hanesan autoridade Covalima hato’o mós agradese prezensa hosi MSI iha Covalima ho sira-nia programa ohin, ha’u foin hatene programa importante tolu ohin foin ha’u atu hala’o hanesan saúde reprodutiva, saúde sekesuál no planeamentu família
Programa tolu ne’ebé implementa iha Covalima bele ajuda komunidade iha munisípiu liuliu sira-ne’ebé iha área rurál ne’ebé ladún asesu informasaun maske servisu saúde munisipal hala’o servisu
“Ho Prezensa MSI iha Covalima atu bele mellora atendimentu ba ita-nia komunidade bazeia informasaun ne’ebé akompañadu hosi mídia MSI hala’o servisu di’ak iha munisípiu seluk, ita espera sira bele halo atendimentu di’ak ba ita-nia komunidade iha Covalima,” nia hateten.
Hafoin Diretora Prestasaun Servisu Ministériu Saúde, Odete da Silva Viegas, finaliza serimónia lansamentu baze Outreach hosi MSI-TL kontinua hala’o vizita uma formasaun iha Mãe Miserikordia iha suku Debos.
Jornalista : Celestina Teles
Editór : Cancio Ximenes
