VIQUEQUE, 19 jullu 2023 (TATOLI)—Grupu traballu finaliza ona implementa programa mão de obra postu administrativu (PMOPA) faze dahuluk iha postu Lacluta, munisípiu Viqueque.
“Pagamentu faze dahuluk ba traballadór sira mós halo ona. Daudaun ne’e ami sei aprezenta relatóriu faze dahuluk, nune’e ami sei kontinua implementa PMOPA ba faze daruak nian,” Administór postu administrativu Lacluta, José Andrade dos Santos, informa ba Agência Tatoli, iha salaun munisípiu Viqueque, kuarta ne’e.
Notísia relevante : PMOPA faze daruak iha Labarai prióriza hala’o limpeza jerál-hamoos baleta
Autoridade postu dehan, durante implementasaun, atividade hotu la’o di’ak tanba uluk duut nakonu iha estrada, maibé ho implementasaun programa, daudaun estrada sira hahú moos.
Impelementasaun PMOPA iha postu Lacluta ho tipu atividade tolu hanesan limpeza jerál, hamos baleta laran no aterru dalan kuak sira.
“Implementasaun programa iha postu Lacluta iha suku haat, ne’ebé kada suku iha grupu lima, ho totál grupu hosi suku haat hamutuk 20 no kada grupu integra traballadór na’in-20 maka hala’o atividade. Ha’u sente programa ne’e di’ak tanba uluk bainhira programa ne’e laiha, dalan sira-ne’e mesak duut maka nakonu, maibé iha implementasaun programa ne’e dalan sai moos no joven sira mós bele hetan osan oituan hodi sustenta sira-nia família,” nia akresenta.
Ba implementasaun programa ne’e, kada postu aloka orsamentu $100.000 ho ninia ezekusaun faze dahuluk 50% no faze daruak 50%.
Jornalista : Vitorino Lopes da Costa
Editora : Julia Chatarina
