MS husu Servisu Saúde Covalima dezeña informasaun fasil komunidade bele kompreende
COVALIMA, 19 jullu 2023 (TATOLI)–Ministériu Saúde liuhosi Diretora Jerál Prestasaun Servisu Ministériu Saúde, Odete da Silva Viegas, husu ba Servisu Saúde Munisípiu Covalima atu dezeña informasaun ne’ebé fasil ba komunidade bele kompreende, nune’e bele halo prevensaun ba moras.
“Ita ko’alia oinsá atu prevene moras servisu promosaun saúde importante ko’alia kona-ba servisu promosaun saúde atu hateten servisu saida mak ita hateten ba ita-nia populasaun-sira, ita tenke dezeña informasaun ne’ebé ita-nia komunidade sira komprende labele ita mak kompreende fali,” Odete da Silva Viegas hato’o liuhosi nia diskursu, iha salaun kongregasaun Irmã Miserekordia, Santa Rosa, kuarta ne’e.
Tanba ne’e, nia dehan, pesoál saúde dezeña informasaun ne’ebé ema hotu bele komprende labele hamosu dúvida ba komunidade nune’e hala’o servisu ho efisénsia no efikasia, bainhira uza termu médika komunidade sira la komprende.
“Ita dezeña informasaun ne’ebé fasil ema hotu bele komprende labele hamosu duvida, nune’e ita-nia servisu bele efisénsia no efikasia liu. Se ita uza termu médiku se la’ós pesoál saúde nia la komprende, ita tenke uza lian no fraze ne’ebé ema bele komprende sai alternativa ne’ebé ita-nia komunidade bele kompreende didi’ak,” nia dehan.
Diretora ne’ e hateten, kona-ba implementa programa Planeamentu Família, pesoál saúde labele obriga komunidade sira tuir tipu planeamentu família saida, maibé hanesan pesoál saúde fahe de’it informasaun hafoin komunidade foti desizaun rasik.
“Ita labele obriga sidadaun atu tuir planeamentu familiar. Ita fó informasaun hafoin desizaun iha sira-nia liman nune’e bele dezeña iha format,” nia dehan.
Aleinde ko’alia kona-ba dezeña informasaun nia mós husu Servisu Saúde Munisípiu Covalima, presiza realiza enkontru hodi hala’o avaliasaun servisu kona-ba implementa programa bolsa da mãe jerasaun foun.
“Ita mós haree programa bolsa da mãe jerasaun foun hanesan meiu ida atu fasilita inan-aman sira ne’ebé rendimentu kiik, maibé ita mós presiza kuidadu osan halo ita haluha rai tanba programa bolsa da mãe serasaun foun ita presiza iha enkontru avaliasaun, ita bele haree hafoin implementa bolsa da mãe jerasaun foun oinsá,” nia hateten.
Entertantu, iha loron 6 fulan-juñu tinan 2023, Governu liuhosi Ministériu Solidariade Sosiál no Inkluzasaun (MSSI) hala’o lansamentu pagamentu Bolsa da Mãe Jerasaun Foun ba inan isin-rua no labarik sira, iha munisípiu Covalima nune’e agora pagamentu sei kontinua la’o seidauk finaliza.
Jornalista : Celestina Teles
Editór : Cancio Ximenes
