MS-USAID valida glosária ba finansiamentu saúde
DILI, 19 jullu 2023 (TATOLI) – Ministériu Saúde (MS) hamutuk ho USAID iha Timor-Leste realiza workshop durante loron ida hodi valida glosária finansiamentu ba saúde sei sai nudar referénsia ba jerente saúde iha nivél hotu hodi utiliza termu finansiamentu ho konsistente.
“Atividade ida ne’e hanesan atividade ne’ebé ami sempre halo ho USAID iha tempu sira liubá tanba USAID suporta Ministériu Saúde liuliu ba fortalesimentu sistema saúde iha teritóriu laran tomak liuliu ba área tolu mak finansiamentu saúde, rekursu umanu no sistema avaliasaun monitorin iha setór saúde nian”, Diretór Jerál Servisu Koorporativu MS, Marcelo Amaral ba jornalista-sira iha Hotel JL-Villa, kuarta ne’e.
Atividade ne’e hanesan mós esforsu ida atu reforma sistema saúde atu bele halo servisu di’ak liután ba populasaun hotu iha territóriu nasionál.
“Ida ne’e meiu ida atu identifika lakuna finansiamentu saúde nian iha ne’ebé, identifika lakuna rekursu umanu ne’e iha ne’ebé no identifika lakuna ba sistema informasaun saúde iha ne’ebé, ita bele rezolve”, nia relata.
Diretór ne’e esplika, glosária hanesan disionáriu ida ne’ebé bele esplika kona-ba definisaun termu sira iha finansiamentu saúde nia-laran.
Iha okaziaun ne’e, Diretora misaun USAID iha Timor-Leste, Zema Semunegus hatete, USAID nia atividade ba sustentabilidade sistema saúde hamutuk ho MS parseiru relevante no sosiedade sivíl atu bele haforsa finansiamentu atu hadia desizaun ne’ebé foti bazeia ba evidénsia hodi masimiza utiliza informasaun ba saúde no dadus finansiamentu.
“Ho kontribuisaun hosi parseiru oioin ba Ministériu Saúde, ita sei kria glosária finansiamentu ne’ebé ho kualidade aas, glosária importante ba ema hotu ne’ebé servisu iha área saúde nian, ida ne’e sei fasilita prosesu sira aprendizajen no sei halo servisu analítiku iha servisu finansiamentu saúde”, Zema dehan.
Nia hatutan, termu finansiamentu saúde hanesan buat foun ba ema barak ne’ebé servisu iha área finansiamentu saúde nian ho uza glosária sai hanesan referénsia ba treinamentu finansiamentu atu define xave ba finansionamentu saúde ho termu ba jestaun finansiamentu públiku.
“Glosária ida ne’e sei hela nudar dokumentu ne’ebé sei bele hadia no sei atualiza regulamentu bainhira presiza”, nia hakotu.
Rekorda fali katak USAID servisu hanesan parseiru Governu Timor-Leste atu apoia dezenvolvimentu efisiente iha área oioin.
Dezde 2001, USAID apoiu ona orsamentu ba dezenvolvimentu Timor-Leste nian hamutuk millaun $323.
Jornalista: Hortencio Sanchez
Editór: Zezito da Silva
