VIQUEQUE, 19 jullu 2023 (TATOLI)—Polísia Nasionál Timor-Leste (PNTL) detein ona suspeitu na’in-hitu, relasiona ho akontesimentu konfrontu entre estudante Ensinu Sekundáriu Jerál Sabika Besi Kulit, iha área Tatilari, suku Matahoi, postu Uatolari, munisípiu Viqueque, tersa (18/07) maizumenus tuku 12:00.
Komandante PNTL Viqueque, Superintendente João da Costa, haktuir, estudante sira tuda malu iha, no ikus mai ekipa taskforce PNTL Viqueque hamutuk ho membru Polísia Eskuadra Uatolari konsege detein suspeitu hodi submete ba prosesu investigasaun hodi hatene motivu akontesimentu.
“Hafoin ida-ne’e, ami sei aprezenta kazu ne’e bá Ministériu Públiku hodi halo prosesu kontinuasaun no halo notifikasaun ba suspeitu sira-ne’e,” Superintendente João da Costa, informa iha ninia knaar fatin, Komandu PNTL Viqueque, Beskem, kuarta ne’e.
Notísia relevante : PNTL Viqueque aprezenta autór rua konfrontu iha Uatolari ba MP
Antes ne’e, iha loron segunda (17/07) estudante sira baku malu maibé parte eskola konsege hakalma situasaun, hafoin iha tersa ne’e akontese filafali no estudante sira lori sai problema ba li’ur hodi hein malu iha dalan, ikus mai baku malu no tuda malu entre estudante no ema hosi li’ur, nune’e rezulta abitante iha área Tatilari nia uma hamutuk lima maka hetan tuda no vítima na’in-hitu ho kanek kama’an.
Aleinde ne’e, bainhira membru Polísia Eskuadra Uatolari halo intervensaun iha terrenu, membru ida hetan tuda ho kanek kama’an.
“Tanba ne’e, ha’u hakarak husu abitante sira, karik suspeitu balun seidauk aprezenta bele bá aprezenta iha PNTL hodi ita hamutuk reforsa prosesu justisa hodi bele hetan pena. Ho ida-ne’e ami nafatin husu autoridade no abitante Uatolari tenke partilla informasaun ne’ebé loos atu ita bele buka tuir autór sira-ne’ebé envolve no komete krime ita lori bá prosesu iha Tribunál, nune’e bele redús krime sira,” nia akresenta.
PNTL sei foti inisiativa atu halo diálogu ho estudante, profesór, inan-aman inklui autoridade lokál relasiona ho problema hirak ne’e, nune’e bele buka solusaun di’ak ba komunidade tomak.
“Ha’u husu ba estudante sira labele hanoin kria de’it problema tanba fatin eskola la’ós fatin hodi kria konflitu entre estudante no estutante, maibé nu’udar fatin ida atu apreende siénsia hodi muda ita-boot sira-nia moris, ida-ne’e maka estudante sira tenke tau ba hanoin,” nia apela.
Jornalista : Vitorino Lopes da Costa
Editora : Julia Chatarina
