DILI, 18 jullu 2023 (TATOLI)—Primeiru-Ministru (PM), Kay Rala Xanana Gusmão, deklara prontu responsabiliza ba konstrusaun Ró Haksolok bainhira iha irregularidade.
Notísia Relevante: PA RAEOA : “progresu konstrusaun Ró Haksolok atinje ona 75%”
“Ha’’u prontu,” Primeiru-Ministru (PM), Kay Rala Xanana Gusmão, hateten iha debate no apresiasaun ba programa IX Governu konstituisionál ba loron daruak iha sala plenária Parlamentu Nasionál, kuarta ne’e.
Xefe Governu hato’o deklarasaun ne’e hodi hatán ba intervensaun hosi Deputada bankada FRETILIN, Maria Ana Bela Sávio, kona-ba foti kestaun relasiona ho Ró Haksolok.
Entretantu, iha ninia intervensaun, Deputada FRETILIN, Maria Ana Bela Sávio, foti kestaun neé relasiona ho Ró Haksolok ne’ebé la kle’ur finaliza ona no sei mai iha Timor-Leste iha tempu badak nia laran.
Notísia Relevante: CNRT laiha tempu debate ho FRETILIN kona-ba fronteira marítima-Ró Haksolok
“Iha tempu ne’eba ita-boot mak hahú, ida-ne’e rezultadu hosi esforsu ne’ebé mak doutór Mari Alkatiri halo ona, polémika kona-ba Ró Haksolok iha públiku sai hanesan polémika boot iha rai-lulik ida-ne’e. Tanba bazeia ba dadus kronolójia kontratu ho Ró Haksolok Dr. Mari sai hanesan terseira pesoa hosi Xanana Gusmão no Pedro Lay, tanba Xanana nu’udar Primeiru-Ministru iha momentu ne’eba no Pedro Lay asume pasta Ministru Transporte no Komunikasaun, iha ne’e públiku tenke hatene katak ita-boot na’in-rua (2) mak foti desizaun no entrega kontinuasaun kontratu ba Mari Alkatiri hodi kontinua hala’o, dadus kompletu iha ne’e” nia hateten.
Nia dehan, tanbasá mak durante ne’e ita-boot na’in-rua (2) nonook de’it lakohi esklarese ba públiku, katak ita-boot na’in-rua (2) mak halo adjudikasaun direitu ba kompañia atu halo Ró Haksolok.
“Karik atu halo auditória, ami husu atu hahú auditória hosi Xanana Gusmão no Pedro Lay. Evidénsia mak ne’e, asinatura sé-sé mak asina kompletu iha ne’e depois lori ba haree fila-fali, dokumentu ne’e ha’u sei entrega,” nia hateten.
Notísia Relevante: Alkatiri: konstrusaun Ró Haksolok sei konklui iha 2023
Jornalista : Nelson de Sousa
Editór : Cancio Ximenes
