Benefisiáriu bolsa méritu 860 submete ona konta bankária ba Edukasuan Covalima
COVALIMA, 20 jullu 2023 (TATOLI)–Xefe Departamentu Parke Eskolár, Manuel França, hateten benefisiáriu bolsa méritu 86% ekivalen ho númeru 860 hosi totál benefisiáriu na’in-985 iha munisípiu Covalima, submete ona konta bankaria ba Servisu Edukasaun Covalima.
“Benefisiáriu bolsa méritu hirak ne’e submete ona sira-nia númeru konta bankaria ba Servisu Edukasaun Covalima maibé iha balun mós seidauk sei kompleta nune’e ami kontinua hein hela tanba sira sei trata dokumentu,” Manuel França hateten ba Agência Tatoli, iha resintu AMC, Sukaer Laran, kinta ne’e.
Bazeia ba dadus totál benefisiáriu ne’ebé benefisia ba programa bolsa méritu hosi munisípiu Covalima na’in-985 ne’e, benefisiáriu-860 kompleta ona dokumentu no falta 13% ekivalen ho númeru benefisiáriu na’in-20-resin mak seidauk submete konta bankaria ba Servisu Edukasaun Covalima.
Nia dehan, benefisiáriu 20-resin ne’ebé seidauk submete konta bankaria maibé Servisu Edukasaun Covalima kontinua hein tanba data limitasaun loron 31 jullu tinan ne’e, nune’e sei kontinua fó tempu ba benefisiáriu-sira.
Entertantu, benefisiáriu ne’ebé atu asesu ba bolsa méritu na’in- 985 hosi eskola 211 ne’ebé estabelese iha Covalima ho totál orsamentu $548,150.00.
Estudante ne’ebé sai benefisiáriu ba bolsa méritu hanesan estudante primeiru siklu ensinu báziku hosi kuartu ano ba kintu ano ho totál benefisiáriu 435, hosi totál eskola 87 ho nia orsamentu $217,500.00.
Benefisiáriu segundu siklu ensinu báziku hosi sestu ba to’o sétimu ho totál estudante 400, hosi eskola 80 ho nia orsamentu $200.000.00.
Nivél eskola terseiru siklu nonu ano benefisiáriu 78, mai hosi eskola 26 ho nia orsamentu $58,500.00.
Estudante nivél eskolár 12 ensinu Sekundáriu jerál ho totál benefisiáriu 12 hosi eskola haat (4) ho orsamentu $9, 000.00, nivél eskolár 12 ensinu Tékniku Vokasionál benefisiáriu 15 hosi eskola lima (5) ho orsamentu $11,250.00.
Nivél eskola ezame pasazen klase hosi 11 ano ba 12 ano ensinu Sekundáriu Jerál benefisiáriu 20 hosi eskola haat (4) ho orsamentu 10.000.00.
Nivél eskola ezame pasazen hosi 11 ano ba 12 ano ensinu Tékniku Vokasionál benefisiáriu 25 hosi eskola lima (5) ho orsamentu $12,500.00 no bolsu méritu nivél munisípiu ba EBC no ESG orsamentu $29,400.00.
Jornalista : Celestina Teles
Editór : Cancio Ximenes
