Klamar Fuik prepara ona figura ba diretór interinu IDN
DILI, 20 jullu 2023 (TATOLI) – Ministru Defeza (MD), Donaciano Costa Gomes Pedro ‘Klamar Fuik’, sei uza kompeténsia hodi halo nomeasaun ba kargu Diretór Interinu Institutu Defeza Nasionál (IDN, sigla portugés).
”Ha’u iha ona ema na’in-haat nia naran ne’ebé atu sai kandidatura hodi asume funsaun hanesan Diretór Interinu IDN, entre figura hirak, iha mós Postu Jenerál ida no iha mós ema sivíl ne’ebé iha esperénsia hodi priénse ba funsaun ida ne’e”, Klamar Fuik hateten ba jornalista Agência TATOLI iha Parlamentu Nasionál, kuarta, ohin.
Klamar Fuik afirma, figura hirak ne’e iha esperiénsia akadémika ne’ebé bele responde ba instituisaun nia interese.
“Ha’u seidauk bele fó sai figura sira ne’e nia naran, maibé em-prinsípiu figura sira ne’e iha esperiénsia akadémika ne’ebé mak bele responde ba instituisaun nia interese”, nia adianta.
Nia esplika, tuir lei-orgánika IDN nian, kuandu diretór IDN halo ona nia funsaun seluk iha Governu, dirasaun IDN propoen ba ministru defeza hodi nomea no indijita fila fali diretór interinu IDN atu interinamente hodi dezempeña funsaun to’o reuniaun konsellu jerál IDN nomea diretór IDN definitiva.
Ezekutivu ne’e esplika, tuir lei-orgánika IDN nian fó dalan ba militár no sivil hod bele asume kargu hanesan diretór interinu IDN.
Jornalista : Natalino Costa
Editór : Zezito Silva
