DILI, 20 jullu 2023 (TATOLI) – Xefe Estadu Maiór Jerál Falintil-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, akompaña hosi Sekretáriu Estadu Veteranus, Cesar da Silva dos Santos ‘Merak’, Komandante Unidade Polísia Militár Abel da Costa ‘Nicky’, Tenente Jenerál Reformadu Lere Anan Timur, inklui família hosi saudozu Venâncio Ferraz hodi hatur fatuk dahuluk ba konstrusaun Estatua Venâncio Ferraz iha Unidade Polísia Militár (PM) Kintál Boot.
Komandu F-FDTL hili saudozu Venâncio Ferraz sai hanesan mahein ba Unidade Polísia Militár (PM), ho objetivu ida katak Saudozu Venâncio Ferraz nudar Komandante FALINTIL kolokadu iha fronteira ne’ebé mantein iha prinsípiu ho nia aten brani hodi funu hasoru okupasaun Indonézia.
Xefe Estadu Xefe Estadu Maiór Jerál Falintil-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, hateten Komandu F-FDTL hili saudozu Venâncio Ferraz hodi konstrui nia estatua iha Unidade Polísia Militár ne’e nudar insiativa Komandu F-FDTL atu fó valór no dignifika saudozu nia kontribuisaun iha luta libertasaun nasionál.
Nia dehan, saudozu Venâncio Ferraz nudar Komandante FALINTIL dahuluk ne’ebé lidera soldadu barak iha zona fronteira. Saudozu nudar ema ne’ebé mak iha prinsípiu no dedikasaun forte no aten brani hodi fó nia aan tomak ba prosesu luta libertasaun nasionál.
Tanba ne’e, iha mandatu Eis–Xefe Estadu Maiór Jenerál F-FDTL, Tenente Jenerál Lere Anan Timur ho insiativa hili saudozu Venâncio Ferraz sai hanesan patronu ka mahein ba Polísia Militár.
“Ohin ita hamutuk ho família Saudozu Venancio Ferraz halo lansamentu fatuk dahuluk ba konstrusaun estatua saudozu Venâncio Ferraz sai mahein ka patronu hodi proteje ita-nia Polísia Militár sira bainhira halo servisu loroloron. Konstrusaun estatutua ida ne’e nudar inisiativa rasik hosi ita-nia Tenente Jenerál reformadu Lere Anan Timur”, Tenente Jenerál Falur iha nia intervensaun durante serimónia hatur fatuk dahuluk.
“Estatua ida ne’e nudar jestu ne’ebé komandu F-FDTL halo atu dignifika no valoriza saudozu Venâncio Ferraz nia-luta ba prosesu libertasaun nasionál”, nia realsa.
Falur hateten, maske saudozu Venâncio Ferraz mate ona, maibé estadu la haluha saudozu hodi kontinua dignifika no fó valór ba saudozu.
“Maske ohin loron saudozu la hamutuk ona ho ita iha fatin ne’e, maibé nia kontente haree ita, tanba ita kontinua fó onra no dignifika nia”, nia afirma.
Tanba ne’e, Xefe Estadu Maiór Jerál F-FDTL, husu ba membru F-FDTL espesiál, ba membru Unidade Polísia Militár atu banati tuir nafatin saudozu Venâncio Ferraz, liuhosi kontinua hatudu servisu di’ak hatudu loyalidade, onestidade, firme iha posizaun no aten brani nafatin.
Iha biban ne’e, Falur mós agradesa ba família Venâncio Ferraz, ne’ebé disponibiliza tempu hodi partisipa direta serimónia hatur fatuk dahuluk Estatua Venâncio Ferraz nian.
Iha fatin hanesan, Lere Anan Timur, rekoñese konstrusaun Estatua Saudozu Venâncio Ferraz ne’e mai hosi nia inisiativa, bainhira sei asume kargu Xefe Estadu Maiór Forsa Armada (XEMFA)
“Ha’u deside konstrui Saudozu Venâncio Ferraz nia-estatua iha polísia militár hodi sai nudar patronu no protetór ba polísia militár ho razaun mak saudozu nia prinsípiu no responsabilidade”, nia afirma.
Lere rekorda katak Venâncio Ferraz nudar komandante ida ne’ebé iha sériu no la halimar ho nia responsablidade.
“Saudozu iha responsablidade bo’ot, nudar komandante no nia iha karakter ida ke ema ida la’os karakten, nia ema ida ke hatene hadomi nia sub-alternu sira. Nia hatene respeita nia soldadu sira, nia hatene mós ema-nia problema no difikulda sira no nia tau interese ema barak nian dúké nia interese rasik”, nia rekorda.
Reprezentante família Saudozu Venâncio Ferraz, Mariano Malik, hateten hanesan reprezentante família sente kontente no onradu tanba Estadu liuhosi Komandu F-FDTL kontinua fó onra no dignifika saudozu Ferraz, hodi tau nia estatua iha Unidade Polísia Militár nudar patronu no protetór ba membru PM tomak.
Jornalista : Natalino Costa
Editór : Zezito Silva
