Motorista ida hetan asidente la konsege salva vida iha postu Uatulari
VIQUEQUE, 20 jullu 2023 (TATOLI)—Motorista, Astanásio João Paulo Leite, hetan asidente iha kuarta (19/07) maizumenus tuku 17:23 lorokraik, iha área Saketu, suku Macadique, postu Uatulari, munisípiu Viqueque.
“Akontese asidente horiseik iha postu Uatulari rezulta motorista lakon vida tanba nia halai ho velosidade lansadu iha dalan kurva, hafoin nia atu silu bulante labele ba xoke hali-hun, nune’e nia família rasik lori bá Sentru Saúde maibé bainhira la’o tuir dalan, nia hakotu iis tanba xoke maka’as,” Xefe Unidade Tránzitu munisípiu Viqueque, Salvador Guterres, informa ba Agência Tatoli, iha postu Viqueque Vila, kinta ne’e.
Notísia relevante : Karreta Hilux ida hetan asidente iha área Lugatoi-Viqueque vila
Matebian hosi diresaun Darabai atu bá Macadique, nune’e bainhira to’o iha área Saelirin, iha kruzamentu atu bá ponte Saekitu, motorista halai ho velosidade másimu no ikus mai xoke hali-hun boot.
“Iha informasaun balun katak motorista ho kondisaun lanu, maibé ami mós labele halo identifikasaun tanba la to’o iha Sentru Saúde motorista iis laiha ona,” nia akresenta.
Polísia Nasionál Timor-Leste (PNTL) Eskuadra Uatulari entrega ona mate-isin ba família, iha kuarta horiseik nune’e bele haloot tuir kultura.
Motorista Atanasio João Paulo Leite ho idade 24, hosi aldeia Betulari, suku Macadique, postu Uatulari, munisípiu Viqueque.
Jornalista : Vitorino Lopes da Costa
Editora : Julia Chatarina
