DILI, 20 jullu 2023 (TATOLI)–Ministru Administrasaun Estatál (MAE), Tomás Cabral, hateten Primeiru-Ministru (PM) Portugal, António Costa, mai vizita Timor-Leste iha tersa (25 jullu 2023) ne’e sei vizita mós fatin istóriku no turístiku Semitériu Santa Cruz-Dili.
Notísia Relevante: Max Stahl: Ha’u Dedika Filme Masakre Santa Cruz Ne’e Ba Mestre Tomas “Belir” Ximenes
“Primeiru-Ministru Portugal sei mai vizita Timor-Leste no vizita mós Semitériu Santa Cruz hodi fó omenajen ba ita-nia maluk sira-ne’ebé mate iha masakre 12 Novembru 1991. Hafoin ne’e sei vizita mós rate balun iha ne’e hanesan padre Carlos nian no sira seluk. Tanba ho ida-ne’e mak ami mai ho administrasaun munisípiu Dili, atu haree kondisaun sira-ne’e atu iha 25 semana oin Primeiru-Ministru Portugál vizita Timor-Leste,” Governante ne’e hateten ba jornalista sira, hafoin hala’o vizita ba Semitériu Santa Crus, kinta ne’e.
Nia hatutan, ba Promeiru-Ministru Portugál nia vizita ne’e presiza fatin moos hodi nune’e bele simu-hasoru Primeiru-Ministru Portugál, António Costa, bainhira mai vizita no fó omenajen ba joven timoroan sira-ne’ebé mate iha fatin ida-ne’e.
“Servisu ita hotu nian, la’ós autoridade de’it/ Autoridade ne’e jere, ita tau orsamentu no Administrsaun Munisipál Dili mak jere, tanba fatin ne’e sai fatin istóriku ita-nian no ho ida-ne’e mak bainaka hakarak mai vizita. Entaun, ita tenke konserva fatin ida-ne’e depois administrasaun Dili tenke halo tratamentu ba fatin ne’e bele moos,” nia hateten.
Notísia Relevante: Militár Sira Lori Karreta “HINO” Sama-Mate Vítima Masakre Santa Cruz
Embaixadora Portugal iha Timor-Leste, Manuela Bairos, hateten Primeiru-Ministru Portugal mai vizita semitériu ne’e hanesan obrigatóriu ida no hanesan símbolu ida ba rezisténsia luta nian.
“Objeitvu vizita Semitériu Santa Cruz hodi antesipa ba Primeiru-Ministru Portugal nian, tanba Semitériu Santa Cruz mak realmente no símbolu ba rezisténsia estudantil ne’ebé luta no mate ba patria ka independénsia Timor-Leste nian. Entaun, Primeiru-Ministru hakarak mai vizita fatin istóriku ida-ne’e,” nia dehan.
Notísia Relevante: Loron 28 Outubru Mak Determina Masakre Santa Cruz
Jornalista : Osória Marques
EDitór : Cancio Ximenes