Rejistu Notariadu Kadastru Covalima defisil lori programa Governu besik ba povu
COVALIMA, 20 jullu 2023 (TATOLI)–Diretór Servisu Munisipal Rejistu Notariadu no Kadastru Covalima, Armindo Monteiro hateten, Rejistu Notariadu no Kadastru Covalima laiha transporte no ekipamentu lori programa Governu hakbesik ba komunidade iha área rurál.
“Ami-nia hakarak lori programa hakbesik ba komunidade maibé ami hasoru difikuldade. Kona-ba transporte bele buka meiu maibé problema liu ekipamentu hodi halo atendimentu ba komunidade,” Armindo Monteiro hateten ba Agência Tatoli, iha nia kna’ar fatin Bairru Rompe, kinta ne’e.
Servisu Rejistu Notariadu no servisu Kadastrál tutela iha Ministériu Administrasaun Estatál (MAE) bazeia ba dekretu-lei númeru 3/2016, altera 54/2020 hodi foti dadus kona-ba sertidaun moris iha suku, nune’e submete dokumentu sira ba Diretór Munisipál Konservatóriu Rejistu Notariadu Covalima hodi prosesa.
“Hafoin prosesa entrega dokumentu sira ba xefi suku ho nune’e tuir dadus ami identifika no ami foti dadus ba sertidaun moris durante fulan neen iha tinan 2023 nia laran ne’e, iha ema 2000-resin ne’ebé halo sertidaun,” nia dehan.
Maske hasoru difikuldade maibé funsionáriu sira buka meiu konsege ba to’o iha komunidede maibé molok atu rekolla dadus sei hala’o sensibilizasaun ba komunidade, tanba balun seidauk iha koñesimentu kona-ba trata dokumentu sertidaun moris.
“Tuir ami nia haree, sidadaun balun seidauk iha interrese atu trata sertidaun moris tanba hainhira sira trata dokumentu instituisaun sira seluk ezije foin atu trata dokumentu, maibé tuir loloos molok instituisaun sira seluk presiza sertidaun moris iha ona,” nia hateten.
Tuir dadus funsionáriu ne’ebé servisu iha Servisu Munisipál Rejistu Notariadu no Kadastru Covalima ne’e, funsionáriu permanente nain-rua (2) no funsionáriu kazuál hamutuk na’in-neen (6).
Jornalista : Celestina Teles
Editór : Cancio Ximenes
