Semitériu Becusse laiha ona espasu atu hakoi mate
DILI, 20 jullu 2023 (TATOLI)–Sekretáriu Estadu Asuntu Toponímia no Organizasaun Urbana, Germano Santa Brites, hateten Semitériu Públiku Becusse laiha espasu hodi hakoi mate no tempu badak sei muda ba Semitériu públiku Metinaro.
Notísia Relevante: Muda semitériu Becuse ba Metinaro sei hein desizaun hosi Governu
“Ita-nia vizita mai semitériu Because ne’e atu haree espasu hodi hakoi ita-nia maluk ne’ebé mak mate hahú hosi ohin to’o iha dezembru. Maibé espasu iha ne’e laiha ona, no tuir informasuan ne’ebé ha’u simu Coveiro katak hosi liman loos to’o iha leten laiha espasu no hakoi mate no agora taka ona. Só espasu uitoan mak dalan ne’ebé hodi la’o maibé Coveiro mós kee hotu oan hodi hakoi mate,” Germano Santa Brites hateten ba jornalista sira, hafoin vizita semitéiru públiku Santa Crus no Becusse, kinta ne’e.
Tanba ne’e, nia dehan, vizita ne’e buka informasaun ne’ebé kle’an kona-ba espasu semitériu nune’e bele relata ba ministériu hodi prepara no haruka ba Konsellu Ministru hodi diskute.
“Agora daudaun ne’e ita sei tahan lai iha fatin ida-ne’e tanba ita-nia Coveiro sira sei haree fatin no iha espasu uitoan hodi bele hakoi, karik sei iha espasu mak tau lai iha ne’e. Maibé ida ba Metinaro ne’e ita prepara iha tempu badak nia-laran no ha’u labele dehan agora ka tinan ne’e ka tinan oin, se iha ne’e labele duni pasiénsia muda ba Metinaro,” nia dehan.
Antes ne’e, Ministru Administrasaun Estatál (MAE) sesante, Miguel Pereira de Carvalho, hateten semitériu Metinaro ne’ebá ne’e 100% preparadu ona no bainhira semitériu públiku Becuse nakonu no laiha ona espasu mak bele lori ema ne’ebé mate ba hakoi iha semitériu públiku Metinaro.
Orsamentu operasionál ba konstrui semitériu públiku Metinaro ne’e, Autoridade Munisipiu Dili (AMD) prevee kuaze rihun $20 hodi fasilita IGEADE, I.P nia servisu iha terrenu.
Jornalista : Osória Marques
Editór : Cancio Ximenes
