DILI, 20 jullu 2023–Primeiru-Ministru (PM), Kay Rala Xanana Gusmão, defende katak elaborasaun Orsamentu Jerál Estadu (OJE) sira tenke bazeia ba programa tanba sistema ne’e monta nanis ona, nune’e labele gasta osan povu nian arbiru.
“Ita-nia sistema temi dehan orsamentu bazeia ba programa, bainhira orsamentu bazeia ba programa, ne’ebé tinan 2024 hasai planu asaun anuál maka hosi ne’e saida mak gasta, saida mak atu halo. Tenke orsamentu pur programa, lae ita estraga osan, osan-ne’e povu nian, loos duni iha fundu petróleu maibé povu maka terus, povu maka manán, ne’ebé osan ne’e povu nian, ita labele estraga arbiru,” Xanana hateten hafoin hala’o reuniaun semanál ho Xefe Estadu, iha Palásiu Prezidensiál, Bairro Pité, kinta ne’e.
Durante reuniaun, Xefe Governu esplika ba Xefe Estadu kona-ba servisu ne’ebé Governu sei halo iha semana hirak tuir mai.
“Agradese ba Prezidente fó konfiansa, nia dehan hein katak semana-semana ha’u bele mai informa saida mak la’o ona, difikuldade saida mak iha. Atu dehan, hasoru malu agora ne’e ba dahuluk nu’udar Primeiru-Ministru hafoin simu pose iha loron 01 jullu 2023 maibé pose de’it la fó kbiit tomak ba Governu, atu atua nu’udar ona Governu, kondisaun ida maka nia tenke iha mak hanesan programa ba tinan-lima aprovadu, tanba ne’e maka horiseik (kuarta) aprova ona programa, kontente tanba pur unanimidade ne’ebé revela mudansa mentalidade, mudansa espíritu atu kaer metin no reafirma Estadu Direitu Demokrátiku, ho ida-ne’e maka primeiru enkontru ofisiál entre Primeiru-Ministru ho Prezidente Repúblika,” Xefe Governu tenik.
Notísia relevante : Orsamentu bazeia programa fornese kustu detallu kada atividade
Nia konsidera, hafoin programa aprovadu maka Governu ne’e legál ona, maibé legál de’it seidauk to’o tanba daudaun maka servisu komesa hahú.
“Hahú oin nusa ne’e mak ha’u informa ba Prezidente katak iha semana sira mai ne’e sei okupadu tebes, primeiru atu haree ba orgánika Governu,” nia akresenta.
Hafoin aprova tiha orgánika Governu, ezekutivu sira sei halo reuniaun no diskusaun ba Orsamentu Retifikativu tanba orsamentu iha ona no to’o fulan-dezembru, maibé tanba Governu foun tenke haree, hahú hosi loron 01 jullu to’o 31 dezembru 2023 tenke iha osan ba atividade balun ne’ebé kontinua no atividade balun ne’ebé karik la persiza.
Hafoin membru Governu hotu sei haree ba planu asaun anuál tinan 2024 nian, tanba programa aprovadu iha Parlamentu Nasionál ba tinan-lima nian.
“Ne’e maka programa hosi tinan-lima nian ne’e ba tinan 2024 atu hahú saida, ka hotu ona iha 2024, buat ne’e tenke kontinua ba tinan 2025 no 2026 mak foin hotu. Ne’ebé saida mak urjente liu halo, saida mak seidauk bele, saida mak só kontinua iha tinan 2025 karik, saida mak tinan 2026 mak halo karik, ida-ne’e maka planu asaun 2024 ne’ebé kaer hosi programa hodi ba halo Orsamentu Jerál Estadu 2024,” nia adianta.
Jornalista : Antónia Gusmão
Editora : Julia Chatarina
