Kompañia Hilobadi hahú rekonstrui moru sentru saúde Suai
COVALIMA, 24 jullu 2023 (TATOLI)–Kompañia kontratór Hilobadi Unipesoál, Lda, hahú hala’o ona servisu hodi rekonstrui moru iha sentru saúde (SS) Suai ne’ebé lokaliza iha aldeia Ahinarai, postu Suai, munisípiu Covalima. ne’ebé monu tanba afetadu hosi inundasaun
“Kompañia hahú rekonstrui moru iha sentru saúde Suai ne’ebé monu tanba impaktu hosi dezastre naturál ho tipu inundasaun ne’ebé akontese iha loron 30 juñu 2022 liuba ne’e,” Diretora Servisu Saúde Munisípiu Covalima, Maria de Fátima Moniz, hateten ba Agência Tatoli, iha nia kna’ar fatin, Camnasa, segunda ne’e.
Kompañia Hilobadi Unipesoál, Lda, hahú hala’o servisu hodi rekonstrui moru iha loron 13 fulan-juñu tinan 2023 ne’ebé sei finaliza iha 31 fulan-novembru 2023 ho nia orsamentu hamutuk $67,587.87.
Traballadór sira-ne’ebé servisu hodi rekonstrui moru hanesan xefe rekonstrusaun tékniku nain-ida (1) ho nia traballadór hamutuk na’in-neen (6), ne’ebé akompañia hosi tékniku hosi Ministériu saúde.
Antes ne’e, udan boot ne’ebé akontese iha loron 30 juñu 2022 liuba ne’e, halo moru Sentru Saúde Suai metru 29 ne’e monu, no bee-mota naksulin tama ba sentru saúde laran hodi estraga ekipamentu saúde hanesan livru rejistu inan isin-rua no imunizasaun nian, no ai-moruk tableta 14 bee lori lakon.
Ho akontesimentu ne’e, iha loron 01 jullu 2022, eis Ministra Saúde Odete Maria Freitas Belo ho nia ekipa tun kedas ba terrenu hodi halo observasaun direta ba inundasaun ne’ebé afetadu ba Sentru Saúde Suai hodi hamonu moru no estraga ekipamentu Sentru Saúde sira.
Jornalista : Celestina Teles
Editór : Cancio Ximenes
