DILI, 21 jullu 2023 (TATOLI)—Xefe Kaza Sivil Prezidénsia Repúblika, Jesuína Maria Ferreira Gomes, sesta ne’e, lansa livru “Investe ba edukasaun liuhosi livru ambientál no saúde báziku hodi asegura moris seguru ba ema hotu” ne’ebé prodús hosi organizasaun naun-governamentál Mary Mackilop Today (MTT).
“Livru ne’ebé lansa sei tulun tebes no motiva ita-nia oan ka labarik sira sira iha sira-nia prosesu aprendizajen iha faze inisiál, liuliu atu hatene kona-ba kestaun ambiente no saúde bázikaa nian. Ha’u espera livru sira-ne’e sei atrai atensaun labarik sira-nian atu lee no kompreende oinsá bele kuida sira-nia aan iha ambiente saudável,” Xefe Kaza Sivil Prezidénsia Repúblika, Jesuína Maria Ferreira Gomes, hateten iha nia diskursu iha salaun OKA, kinta ne’e.
Nia parabeniza ekipa no pesoál sira hotu nia esforsu ba produsaun livru hirak ne’e, no gabinete Prezidénsia Repúblika apresia kontribuisaun hosi Mary Mackilop Today (MTT) ne’ebé iha dedikasaun makaas atu tulun labarik sira iha Timor-Leste, liuliu sira-ne’ebé hela iha área remota hodi hadi’a sira-nia literásia.
Xefe Kaza Sivil ne’e reprezenta Prezidénsia Repúblika iha eventu ne’e tanba Prezidente Repúblika labele partisipa iha asuntu seluk, nune’e delega nia-parte partisipa iha eventu ne’e.
Nia hateten, konsensu globál reafirma katak edukasaun nu’udar forsa atu transforma moris ema nian, edukasaun ne’e sentrál ba dezenvolvimentu nasaun ida.
Ba Timor-Leste setór edukasaun iha papél importante ida atu prepara didi’ak timoroan sira kualifikadu atu lori nasaun ne’e ba oin, ida-ne’e interrese nasionál ne’ebé rekere aproximasaun olístiku iha nivel sira hotu.
Ho hanoin ne’e mak Prezidente Repúblika hamosu vizaun ida durante mandatu konstituisionál katak labarik sira ho idade ka tinan tolu to’o lima tenke asesu edukasaun pre-eskolár atu prepara fundasaun ida forte ba iha nível edukasaun sira tuir mai.
Nu’udar órgaun Estadu Prezidénsia Repúblika serbisu hamutuk ho órgaun ezekutivu liuliu Ministéiru Edukasaun no parseiru sira hotu inklui mós Mary Mackilop Today (MTT) hodi kontinua halo advokásia hasa’e konxiénsia komun kona-ba importánsia hosi edukasaun pre-eskolár.
Papel importante hosi Prezidénsia Repúblika mak atu halo advokásia ba órgaun ezekutivu hodi kontinua investe iha setór xave sira hanesan edukasaun, saúde atu asegura labarik sira liluiu iha Timor-Leste entre tinan tolu to’o lima moris saudável ho nutrisaun di’ak, edukadu no seguru.
“Prezidente Repúblika kontinua hala’o diskusaun ho Governu atu tau atensaun makaas ba área rua ne’e,” nia dehan.
Prezidente Repúblika preokupa tebes ho labarik sira-nia futuru, nune’e hafoin simu pose iha tinan kotuk inísia atividade feira livru nu’udar meiu atu promove literásia ba labarik sira, kontinua hametin importánsia hosi lee livru no kuda kultura lee ba labarik sira no mós ba komunidade edukativa sira.
“Feira ne’e importante tebes atu motiva leitór sira hatoman sira-nia aan ho kultura lee hodi aumenta sira-nia koiñesimentu, iha sorin seluk bele mós motiva hakerek na’in sira atu kontinua prodús livru ho títulu oioin hodi bele fasilita leitór sira hotu,” nia hateten.
Prezidénsia Repúblika agradese tebes Mary Mackilop Today (MTT) iha atividade ne’e ho fasilidade hanesan livru didátiku oioin no bibliotéka movel ne’ebé tulun tebes labarik sira iha área rurál hodi bele apriende no hakle’an sira-nia koñesimentu.
Atu formaliza entre gabinete Prezidénsia Repúblika no Mary Mackilop Today (MTT) parte rua asina ona akordu ida iha fulan abril tinan ne’e, ne’ebé hamosu kompromisu atu serbisu hamutuk promove literásia no partila opiniaun ba malu hodi asegura katak labarik sira no komunidade edukativa hotu hetan duni impaktu pozitivu hosi atividade ne’ebé parte rua realiza ona no sei kontinua tan.
Jornalista : Nelson de Sousa
Editór : Cancio Ximenes
