BOBONARO, 22 jullu 2023 (TATOLI)—Prezidente Kooperativa Kréditu Uniaun Lakon Nakukun Mosu Naroman (LANAMONA), Domingas dos Santos, iha mehi ba futuru hakarak harii banku iha kada suku hodi fasilita komunidade halo transasaun osan.
“Ami iha mehi atu harii banku boot ida hodi kompete ho banku nasionál no internasionál, maibé banku ne’e ami hakarak harii iha kada suku, nune’e bainhira populasaun hakarak foti no rai osan, halo kedas iha sira-nia suku no sira atu empresta osan karik la presiza tuir kritéria barak no bá banku la presiza antrian,” Domingas dos Santos, hateten iha sede kooperativa, suku Odomau, postu Maliana, munisípiu Bobonaro, sábadu ne’e.
Notísia relevante : Tomada pose estrutura LANAMONA, Diretór SEKoop husu dezenvolve kooperativa
Prezidente kooperativa iha esperansa hamutuk ho estrutura sira sei kontinua esforsu no servisu maka’as hodi dezenvolve kooperativa ne’e bele atinje mehi.
Objetivu harii kooperativa maka atu eduka membru rai osan ba futuru inklui halo jestaun osan ho di’ak.
“Ohin loron povu barak mak lamenta no sempre husu atu Governu tau matan, hosi ida-ne’e maka ami lakoi povu dependente, entaun ami eduka povu hodi hatene halo jestaun no poupa osan atu sira bele moris di’ak, nune’e bele prevene violénsia doméstika iha povu nia le’et tanba dala barak kuandu osan laiha feto sira sempre sai vítima,” nia akresenta.
Eis Deputada V lejislatura ne’e konsidera, liberta pátria tenke mós liberta povu, nune’e presiza halo asaun konkreta, ne’ebé hakerek ona iha Konstituisaun RDTL artigu 138 kona-ba setór kooperativa hanesan sosiu-ekonómiku ba dezenvolvimentu sustentável.
Ho baze fundamentál ida-ne’e maka iha setembru 2004, Grupu Feto Rezisténsia kompostu hosi ema na’in-13 organiza-an hodi forma grupu rai osan hamutuk ho kapitál inisiál $350 hodi fo empresta ba malu atu fila liman, nune’e bele atende nesesidade família uma-laran.
Iha loron 19 jullu 2008 liuhosi Asembleia Jerál iha munisipiu Bobonaro, grupu ne’e transforma-an ba kréditu uniaun ho naran LANAMONA, ho membru fundadór hamutuk na’in-40, ho totál kapitál $7.000.
Asembleia ne’e realiza ho apoia hosi Diresaun Nasionál Kooperativa no iha momentu ne’ebá Ministru Ekonomia Dezenvolvimentu, João Mendes Gonçalves fó pose ba estrutura kooperativa.
Kooperativa kréditu uniaun LANAMONA mai ho vizaun nu’udar instituisaun finanseira atu kompete ho instituisaun finanseira seluk no bele foló prosperiedade ba membru sira tuir prinsípiu kooperativa kréditu uniaun, enkuantu misaun maka forma organizasaun LANAMONA ne’ebé prontu serbí membru liuhosi rai no foti osan tuir nesesidade membru idak-idak atu nune’e bele kapasita dezenvolvimentu setór ekonomia hodi fó prosperiedade ba membru sira.
Iha tinan-15 ezisténsia, koperativa ne’e konsege akumula ona kapitál millaun $1,315, ho totál membru 2.120.
Daudaun konsege loke liras harii sukursál iha Dili, postu Gleno munisípiu Ermera no munisípiu Aileu. Tuir planu sei loke tan sukursál iha Liquiçá no Covalima.
Kréditu ne’ebé fó ba membru sira hosi $150 to’o $10.000 hodi halo atividade ekonómika iha setór agrikultura, peska no pekuária, halo to’os no natar, inklui hakiak animál karau, fahi no ikan.
Jornalista : Sérgio da Cruz
Editora : Julia Chatarina
