DILI, 23 jullu 2023 (TATOLI) – Ministériu Saúde (MS) no Organizasaun Mundiál Saúde (OMS) enkoraja komunidade munisípiu Lautem atu halo ezersísiu fíziku ho instalasaun Outdoor Gym Lautem hodi reduz no prevene moras la hada’et.
Minsitra Saúde, Élia dos Reis Amaral esplika katak ezersísiu fíziku importante tebes atu reduz no kombate moras la hada’et.
“Outdoor Gym ne’e importante ba komunidade sira atu bele halo ezersísiu fíziku hodi reduz no prevene moras fuan, diabetes, kankru, hipertensaun, stroke no morsa la hada’et seluk,” Ministra Élia hato’o, iha lansamentu Outdoor Gym, Lautem, sábadu ne’e.
Nune’e mós, Reprezentante OMS Timor-Leste, Arvind Mathur haktuir katak Outdoor Gym kompostu husi ekipamentu lubun ida ne’ebé sei ajuda komunidade Lautem atu halo ezersísiu fíziku oi-oin.
“Ideia husi instalasaun Outdoor Gym ne’e mak atu promove atividade fíziku entre joven feto no mane, idozu no labarik sira. Atividade fíziku importante tebes ba ita nia saúde. OMS rekomenda atu komunidade sira pelu menus hala’o ezersísiu fíziku mínimu minute 35 kada loron hodi reduz risku atu hetan moras la hada’et,” Arvind esplika.
Nia ekresenta katak atividade fízika sei kontribui maka’as ba redusaun risku atu hetan moras la hada’et sira.
Instalasaun Outdoor Gym ne’e rasik hetan apoiu másimu husi OMS ein-termu tékniku no finanseiru.
Alende Lautem, OMS no MS mos instala ona Outdoor Gym iha munsípiu seluk.
Iha seremónia lansamentu Outdoor Gym ne’e rasik, Ministra Élia no Reprezentante OMS Arvind Mathur mak nu’udar ema dahuluk koko hala’o atividade fízika iha outdoor gym refere.
Jornalista : Filomeno Martins
Editór : Rafael Ximenes de A.Belo
