LAUTEM, 23 jullu 2023 (TATOLI) – Minsitériu Saúde (MS) hamutuk ho Organizasaun Mundiál Saúde (OMS) Instala Sentru Operasaun Emerjénsia Saúde Lautem iha munisípiu Lautem hodi prepara atu responde ba situasaun emerjénsia hanesan dezastre naturál no seluk iha futuru.
Ministra Saúde, Élia dos Reis Amaral hateten, lansamentu sentru refere atu prepara ekipa emerjénsia saúde hodi responde ba situasaun emerjénsia sira. “Karik iha situasaun emerjénsia ruma hanesan dezastre naturais, pesoál sira sei konsentra sira nia esforsu hodi fo atuasaun ba situasaun emerjénsia sira.”
Ezekutiva ne’e dehan, sentru ne’e la’ós de’it atu responde ba situasaun emerjénsia, maibé mós halo transferénsia ba pasiente husi sentru saúde ba ospitál referál no Ospitál Nasionál Guido Valadares (HNGV).
“Entaun Ministériu Saúde hanoin hela atu estabelese tan sentru hanesan iha munisípiu sira ne’ebé mak seidauk iha,” Ministra Elia hato’o iha Lautem, sábadu ne’e.
Alende Lautem, MS ho OMS mós estabelese ona Sentru Operasaun Emerjénsia Saúde Lautem iha munisípiu seluk hanesan Dili, Ainaro no RAEOA.
Instalasaun Sentru Operasaun Emerjénsia Saúde Lautem hetan apoiu téknika no finanseiru husi Organizasaun Mundiál Saúde.
Iha parte seluk, Reprezentate OMS iha Timor-Leste, Arvind Mathur haktuir katak Sentru refere hanesan fatin ida ba ekipa Lautem hodi iha koneksaun direta ho Sentru Dili, Ainaro, Oe-Cusse, OMS no Ministériu Saúde bainhira akontese situasaun emerjénsia iha Munisípiu Lautem.
“Karik akontese situasaun emerjénsia ruma hanesan dezastre naturais, inklui rai-halai, inundasaun, no insidente boot ruma, ekipa sira presiza diskute atu husu apoiu husi Dili. Entaun, ekipa lautem bele kontaktu ho Sentru Operasaun Emerjénsia Saúde iha Dili, no iha munisípiu seluk liuhusi fasilidade ne’ebé mak ita instala ona hanesan vídeo konferénsia, internet, no ekipamentu seluk liu-liu ba preparasaun, atuasaun, no responde ba situasaun emerjénsia,” Arvind ba Tatoli, iha Lautem, sábadu ne’e.
Nia dehan, OMS fó ona apoiu ba MS atu iha preparasaun di’ak hodi fo atusasaun ba situasaun emerjénsia iha futuru.
Nune’e mós, Diretór Jerál SNAEM, Horacio da Costa Sarmento hateten, MS hetan apoiu másimu husi OMS hodi halo intalasaun ba sentru refere iha Munisípiu sira. “Ita-nia espetativa mak atu estabelese sentru hanesan iha munispiu hotu.”
Journalista: Filomeno Martins
Editór : Rafael Ximenes de A. Belo
