Ai-moruk tipu 98 “stock out” iha farmasia SSM Covalima
COVALIMA, 24 jullu 2023 (TATOLI)–Diretora Servisu Saúde Munisípiu Covalima, Maria de Fátima Moniz, hateten dadaun ne’e ai-moruk konsumavél ho tipu ai-moruk hanesan esensiál ho non esensiál hamutuk tipu 98 stock out durante fulan-ida ona, iha farmásia Servisu Saúde Munisípiu (SSM) Covalima.
“Durante iha fulan neen (6) ai-moruk balun ita hetan stock out loloos labele atu akontese. Iha Farmasia Servisu Saúde Munisípiu Covalima hosi tipu ai-moruk totál 262, ne’ebé tipu ai-moruk 98 ho 37% stock out,” Maria de Fátima Moniz hateten ba Agência Tatoli iha nia kna’ar fatin Camnasa, segunda ne’e.
Ho estoke ai-moruk tipu 98 ne’ebé stock out, une’e Servisu saúde Munisípiu Covalima halo kontrola iha sentru saúde no postu saúde sira uza maneira dadeer halo atendimentu, hafoin lorokoraik konta ai-moruk nune’e bele hatene tipu ai-moruk ne’ebé uza no bele hatene tipu ai-moruk saida mak stock out.
Nia dehan, ai-moruk tipu 98 ne’ebé stock out ne’e nia fahe ba tipu ai-moruk hanesan ai-moruk vitál, esensiál ho non esensiál stock out durante fulan ida.
“Ita bolu ai-moruk vitál tenke iha, estoke out labele liu loron 15 no buka meiu tenke iha. Tanba, liga ba ai-moruk emerjénsia presiza lalais hodi bele salva ema-nia vida. Ai-moruk esensiál hanesan Paracetamol, Amocilin nia stock out bele liu loron 15, bele haruka pedidu hodi buka tuir. Ai-moruk non esensiál hanesan salep (pomada)sira stock out mós la problema, bele haruka pedidu ho durasaun tempu kle’ur tanba la fó impaktu ba ema nia vida,” nia esplika.
Entertantu, Governu liuhosi Ministériu Saúde estabelese ona Sentru Saúde hitu iha postu administrarivu Fatululik, Maucatar, Fohorem, Fatumea, Tilomar, Zumalai no Suai ho estabelese ona postu saúde 24 iha Covalima.
Jornalista : Celestina Teles
Editór : Cancio Ximenes
