Deputadu CNRT husu Governu kontrola okupante uma Estadu iha Surikmas-Delta
DILI, 24 jullu 2023 (TATOLI)—Deputadu hosi bankada CNRT iha Parlamentu Nasionál (PN), Natalino dos Santos, preokupa ho populasaun ka okupante uma Estadu hanesan eis rezidénsia (perumahan) ba funsionáriu públiku ne’ebé Governu Indonézia husik hela hodi halo rekonstrusaun foun, nune’e Governu presiza kontrola hodi regulariza didi’ak.
Notísia Relevante: Lei Seidauk Define Okupante Sai Nain Ba Uma Estadu
“Ha’u hakarak foti kestaun uma no rai abandonadu Indonézia nian, haree hanesan perumahan sira iha Surikmas, Delta, ne’e propriedade Estadu maibé daudaun ne’e ita haree perumahan sira-ne’e barak komesa hadi’a. Ha’u la hatene barak, Estadu atribui tiha ona sidadaun okupante sira hela ne’eba ka oinsá, tanba balun komesa konstrui ona uma andar,” nia levanta liuhosi reuniaun plenária PN, segunda ne’e.
Tambá ne’e Estadu tenke haree liliu Ministéiru Justisa no Sekretária Estadu Terra no Propriedade, tanba rai no uma Estadu administra hosi Governu mak tenke tau matan nune’e bele fó kontratu ka selu arrerendamentu hodi fó reseita ba Estadu tanba agora dezorganizadu.
“Ita haree desórganizadu. Perumahan Indonezia nian ne’ebé hosik hela, okupante sira uza balun faan tutan fali ona ne’e Estadu mak lakon. Propriedade Estadu entaun Estadu tenke kontrola, tanba ne’e bolu atensaun ba Ministéiru Justisa ho Ministériu Administrasaun Estatál atu haree asuntu ne’e, ida-ne’e importante tebes,” nia hateten.
Se lae, nia dehan, aban bainrua Estadu atu halo dezenvolvimentu ruma iha ne’eba, bainhira to’o ne’eba sira husu fali indemnizasaun no ikus mai Estadu lmak akon nafatin.
Nia mós foti kestaun kona-ba okupante sira uluk hela iha rai ida asrama polisi (ASPOL) iha besik Ministériu Solidariedade Sosiál nian, Governu indemniza tiha ona hodi hasai sira hosi fatin ne’e, no agora okupante sira fila-fali ba de’it iha hodi hela iha ne’eba, nune’e instituisaun tutela presiza tau atensaun sériu ho lalais atu regulariza.
Prezidente Parlamentu Nasionál, Maria Fernanda Lay, konsidera asuntu ne’ebé levanta importante mós, nune’e hein katak Governu bele tau atensaun.
Notísia Relevante: Tempu Badak, Autoridade Munisípiu Dili Sei Hasai Okupante Iha Eis ASPOL
Jornalista : Nelson de Sousa
Editór : Cancio Ximenes
