Membru PN preokupa ho situasaun seguransa
DILI, 24 jullu 2023 (TATOLI)—Deputadu hosi bankada FRETILIN iha Parlamentu Nasionál, Florentino Sinarai, preokupa ho situasaun seguransa iha kapitál Dili nune’e husu ba Polísia Nasionál Timor-Leste (PNTL) atu asegura seguransa ba populasaun nia movimentu iha loron no kalan.
“Hakarak fó hanoin ba parte Governu katak, situasaun seguransa loron hira ne’e iha Dili laran de’it mós seguransa ita preokupa tebes. Loron hirak ne’e, ita hotu hatene iha de’it Palásiu Governu nia oin, depois tesik ba ema responsabilidade laiha sira palang komunidade iha dalan hodi sira la sente hakmatek, sira la la’o livre. Tanba ne’e, husu ba parte Governu haree kestaun seguransa,” nia hateten liuhusi reuniaun plenária PN, segunda ne’e.
Nia dehan, aliened iha área Beto tuda malu horikalan kedas no semana ida ona iha tempu kalan, no bainhira parte seguransa liuliu membru PNTL ba asegura no fila-fali ba fatin seluk, komunidade kontinua tuda malu.
“Tanba ne’e, husu Parlamentu Nasionál atu husu ba Governu tau atensaun ba seguransa,” nia hateten.
Deputadu CNRT, Natalino dos Santos, foti situasaun seguransa iha Casa-Ainaro ne’ebé presiza fó atensaun.
“Ha’u hakarak foti situasaun seguransa liuliu kondisaun seguransa iha suku Casa (Ainaro), ita rona liu ba iha Casa mosu konfrontu entre joven sira fulan ida liu ona. Maske situasaun ne’e hakmatek hikas ona maibé povu sira kalan ta’uk nafatin, tanba iha joven sira sempre tuda malu,” nia hateten.
Nia hakarak husu de’it oinsá polísia ninia atuasaun, tanba nia-parte hetan informasaun hosi populasaun Casa, sira lamenta tebes situasaun iha Casa ne’eba tanba katuas ho ferik sira kalan-kalan sira labele toba iha sira-nia uma no tenke evakua ba fatin seluk.
“To’o agora atuasaun la hakmatek nafatin, maizumenus komandante PNTL distritu ne’e ema Casa, maibé situasaun iha Casa pániku tebes. Tanba ne’e, bolu atensaun ba komandu PNTL atu haree situasaun iha Ainaro liuliu iha suku Casa, tanba kuaze fulan ida ona populasaun sira iha Casa toba la hakmatek,” nia dehan.
Deputadu FRETILIN, Antoninho Bianco, hateten kestaun seguransa fó hanoin iha fatin-fatin akontedsmentu Ofisiál Polisiamentu Suku (OPS) ladún barak karik bele aumenta membru no bele mós apoiu fasilidade karreta hodi sira bele halo movimentu kualkér tempu.
“Karik polísia menus tenke halo rekrutamentu tanba ita haree polísia balun tama ona idade reforma, tanba ko’alia kona-ba seguransa nia kuantidade no kualidade fó imajen ba rai-li’ur atrai mós investidór sira mai Timor-Leste,” nia hateten.
Jornalista : Nelson de Sousa
Editór : Cancio Ximenes
