Mota Baer difikulta estudante EBF partisipa ezame períodu daruak
COVALIMA, 24 jullu 2023 (TATOLI)–Mota Baer ne’ebé lokaliza iha suku Beiseuk, postu administrativu Tilomar, munisípiu Covalima, difikulta estudante-sira atu ultra pasa hodi partisipa ezame períodu daruak tanba kondisaun klima agora daudaun udan.
“Ha’u simu informasaun hosi ha’u kolega profesór-sira katak ohin dadeer volume bee-mota Baer makaas duni , nune’e bainhira estudante sira atu ultra pasa tenke hein. Agora, bee-mota menus nune’e estudante sira bele ultrapasa hodi partisipa ezame,” Koordenadór Ensinu Báziku Filiál Bear, Constantino Cardoso, hateten ba Agência Tatoli, liuhosi telefonika, segunda ne’e.
Nia hateten, hafoin estudante husi EBF Baer finaliza ezame paríodu daruak mak bainhira kontinua udan no volume bee-mota Baer suli makaas mak profesór sira sei la autoriza estudante sira atu fila maibé sei hein bee-mota menus mak foin haruka sira fila ba uma.
Koordenadór mós rekomenda ba Governu atu konstrui ponte, nune’e bainhira tempu udan mota Baer labele fó ameasa ba estudante sira, ba transporte públiku noa ba movimentu ema atu la’o ba-mai.
Tuir dadus, estudante sira iha Eskola Bázika Filiál Baer hamutuk na’in-60 ne’ebé ho nia profesór hamutuk lima (5), no hosi númeru ne’e profesór feto hamutuk tolu (3) no mane mane hamutuk rua (2).
Tuir observasaun, Agência Tatoli nota katak estudante hosi eskola 211 ne’ebé estabelese iha Covalima hahú hala’o ezame avaliasaun ba períodu daruak bazeia ba kalendáriu hosi Ministériu Edukasaun Juventude no Desportu (MEJD).
Jornalista : Celestina Teles
Editór : Cancio Ximenes
