Negosiante bele faan iha Jardin Largo Lecidere maibé labele hela permanente
DILI, 24 jullu 2023 (TATOLI)–Diretór Servisu Munisipál Jestaun Merkadu no Turizmu, Arthur Henriques, hateten Govenu nia alternativu ida mak negosiante bele faan sasán iha Jardin Largo de Lecidere maibé sira labele hela permanente iha ne’eba.
“Fatin ne’e hodi labarik sira atu halimar no fatin atu estuda. Fatin ne’e ba Vizitante balun vizita hidi hola anin la’ós ba loke biliar hodi kria problema, tein no han depois la tau lixu nia fatin. Pior liután mak sira toba iha laran. Negosiante sira bele faan maibé kalan tenke ba uma la’ós ba toba no han fali iha laran,” Arthur Henrique hateten ba Tatoli, iha nia kna’ar fatin Matadouro, segunda ne’e.
Nia hatutan, iha dekretu-lei Númeru 33/2008, 20 agostu, iha artigu 1-5, 6 no 7, ne’e ko’alia kona-ba armonizasaun ordenamentu territóriu iha Kapitál Dili, no iha negosiante sira balun mak okupa iha área protejida ne’e hanesan okupasaun illegál.
Nune’e mós, iha ona sirkulár númeru 401/AMD ba negosiante sira katak negosiante sira mós konkorda ona katak sira sei abandona fatin refere no AMD fó prazu ba negosiante sira-ne’ebé faan sasán iha Jardin Largo Lecidere ne’e to’o de’it iha 01 agostu.
Iha tempu badak, sei iha nota entendimentu entre Autoridade Munisípiu Dili (AMD) ho negosiante sira, tanba jardin ne’e enves ordena sai sidade moos no furak maibé sai fali fatin permanente ba negosiante sira hodi faan, toba, haki’ak animál, tein no halo foer fatin ne’e.
“Aat liután mak loke Biliard hodi kria problema depois dada fiu rungu-ranga iha fatin ne’ebá. Ida-ne’e ami haree labele, nune’e ami fó sira prazu to’o 01 agostu ne’e, fatin ne’ebá tenke hamamuk ona,” nia dehan.
Karik AMD iha polítika ruma atu ordena fatin ne’e hodi kria konsidaun atu konstrui uma ba negosiante sira atu faan, nia hatán, sei iha nota entendimentu ida nune’e oinsá bele organiza di’ak atu faan no tau lixu iha ‘lixeira”.
Maibé, nia dehan, nia parte sei kordena ho autoridade suku inklui administradór postu administrative sira iha Dili, tanba orientasaun ne’e mai hosi Prezidente Autoridade Munisípiu Dili (AMD).
“Ida-ne’e ha’u hetan orientasaun hosi Prezidente maibé ha’u labele fó sai lai tanba ha’u sei koordena ho autoridade suku sira no polísia eskuadra sira. Aleinde ne’e, ami sei halo aproximasaun ho negosiante sira atu ko’alia kona-ba kondisaun ne’e,” nia dehan.
Jardin sira ihaa Dili laran atu moos no matak mak presiza negosiante ambulante nia kontribuisaun hodi bele iha armonizasaun ba jardin ne’ebé sai fatin konservasaun ida, nune’e husu ba negosiante sira tenke husik mamuk fatin refere tanba jardin la’ós májia sai fatin ba faan sasán no sai hela fatin permanente.
Jornalista : Osória Marques
Editór : Cancio Ximenes
