Padre Alipio sei hato’o relatóriu rua ba Bispu Dom Leandro Alves
BAUCAU, 24 jullu 2023 (TATOLI) – Padre Alipio Pinto Gusmão sei hato’o relatóriu rua relasiona ho mandatu Administradór Dioseze Baucau durante tinan-2022 nian ba Bispu Dom Leandro Maria Alves.
Administradór Dioseze Baucau, Padre Alipio Pinto Gusmão, esplika, bainhira mandatu termina sei intrega relatóriu rua hanesan relatóriu pastorál ne’ebé kada tinan kada pároku sira halo inklui relatóriu subvensaun públika.
“Ha’u sei entrega rezultadu ne’e inklui observasaun balun ne’ebé bispu foun presiza haree atu buka solusaun bazea ba relatóriu ne’e,” Administradór Diosezanu Dioseze Baucau hateten iha Vila Antiga, segunda ne’e.
Kona-ba relatóriu auditória subvensaun públika finaliza ona ne’ebé orsamentu refere kada tinan governu ajuda liuhosi Konferénsia Episkopál Timorense (CET, sigla portugés) durante mandatu Administradór Dioseze Baucau nian iha tinan-2022.
Padre Alipio, espresa sentimentu kontenti tanba Dioseze Baucau iha ona Bispu foun Dom Leandro Maria Alves, hafoin tinan-ida fulan ualu Dom Basilio do Nascimento hakotu peregrinasaun hosi mundu.
Padre Alipio, esplika, administradór hanesan administra de’it tanba situasaun balun realsiona ho Dom Basilio do Nascimento husik hela mundu nune’e liuhosi festa konsagrasaun festa episkopál Dom Leandro Alves ofisiálmente lidera Dioseze Baucau.
Durante sai Administradór Dioseze Baucau padre Alipio, hasoru dezafiu no problema balun hasoru iha Dioseze ne’ebé kompeténsia tomak Bispu mak tenke foti desizaun hodi solusiona.
“Esperansa mak prinsípiu sinolidade no unidade, Bispu dom Leandro Alves mai nu’udar sinál unidade nian entre nai-lulik no sarani sira,” Padre Alipio akresenta.
Dioseze Baucau oan hotu tenke la’o hamutuk iha dalan-ida atu haboot reinu Maromak nian, liuliu sarani sira hola parte iha kumuñaun no partisipa iha misa uma kreda nian.
Padre Alipio Gusmão, hateten, hanesan bispu foun asume knaar importante nune’e presiza rona, haree antes halo planu inklui estratéjia atu haboot reinu Maromak nian iha Dioseze Baucau.
Mandatu Administradór Diosezanu Dioseze Baucau rasik remata hafoin misa ordenasaun episkopál no toma pose Bispu Dioseze Baucau Dom Leandro Maria Alves ne’ebé realiza iha loron-21 jullu hafoin administra Dioseze durante tinan-ida fulan ualu.
Jornalista : Natalino Belo
Editór : Evaristo Soares Martins
