RAEOA selebra fulan Praid ho LGBTI ‘hakuak no respeita diversidade’
OÉ-CUSSE, 24 jullu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), segunda ne’e selebra fulan praid (sigla ingles) ka fulan orgullu ho grupu ema LGBTI (Lesbian, Gay Biseksuál Transjender Interseksuál ) ho tema ‘’Respeita Diversidade no hakuak Diversidade’.
Selebrasaun ne’e, organiza hosi Gabinete Prezidente Autoridade RAEOA liuhosi Unidade Promosaun Igualdade Jéneru no Inkluzaun Sosiál, ho objetivu atu promove interese no kria enviromentu iha iha inkluzivu ba ema LGBTI+ iha Oé-Cusse Amveno.
Nune’e mós atu sensibiliza ba ajente administrasaun públiku, maneira sira atu apoia di’akliu-tán liu-liu iha servisu fatin ba ema LGBTI+.
Notísia relevante:Governu Mós Iha Polítika Protesaun ba Komunidade LGBTI
Prezidente Autoridade RAEOA, Arsénio Paixão Bano, hafoin partisipa selebrasaun ne’e, hateten, fulan praid ba grupu LGBTI+, loloos selebra iha fulan-juñu tanba maibé tanba okupadu ho servisu, nune’e adia ba fulan jullu ne’e.
Nu’udar Prezidente Autoridade, orgullu no kontente, Autoridade garantia direitu umanu, katak laiha diskriminasaun ba nia sidadaun hotu, trata ema hanesan ema.
“Ema hotu bele livre, maibé nia hun mak respeita malu, la’os respeita ema sira laiha diferensia ne’e maibé tenke respeita ema hotu, katuas ferik no labarik sira iha diferensia fízika biolojia labele tau iha kestaun,” Arsénio Bano ko’alia, iha ámbitu selebrasaun ne’ebé realiza iha Otél Ambeno.
Durante selebrasaun fulan praid ne’e, realiza mós semináriu ho tema ‘’Respeita Diversidade no hakuak Diversidade’, hodi promove diálogu entre sosiedade, Autoridade, akadémika no komunidade LGBTI.
“Ha’u hanoin semináriu ohin ne’e importante, atu ema hotu bele ko’alia sai, ita mós tenke rona nia di’ak ne’e iha ne’ebé, tanba nasaun ne’e atu di’ak ne’e labele ema ida iha kotuk, entaun ema hotu-hotu tenke partisipa,” nia afirma.
Nune’e nia rekomenda ba sidadaun hotu, persiza respeitu malu, tanba ema LGBTI+ ejiste iha fatin hotu-hotu no moris hamutuk iha sosiedade, halakon diskriminasaun, tanba ema hotu nu’udar kriatura Maromak.
Prezidente Konsellu Diretiva Fundasaun Coalition for Diversity and Action (KODIVA), Natalino Hornai Guterres, sente orgullu tanba Autoridade RAEOA organiza hodi selebra fulan praid, alénde iha nasionál maibé iha rejiaun mós komemora nune’e bele sai ezemplu iha territóriu nasionál, tanba iha Oé-Cusse komunidade LGBTI+ barak mak moris livre no bele sai sira-nia an rasik.
“Semináriu ohin ne’e ami ko’alia barak fokuliu ba ezisténsia komunidade LGBTI+ iha Timor-Leste no kestaun legál, liga ba ezisténsia LGBTI+ no sosiedade ninia nia haree no mós kona-bá aspetu legál sra-ne’ebé maka iha,” nia katak.
Nune’e nia rekomenda ba Autoridade RAEOA atu kontinua organiza fulan praid kada tinan, nune’e hasa’e dizibilidade komunidade nian, tanba komunidade barak mak sei taka-an, tan ne’e liuhosi dizibilidade bele sente seguru liután, no hola parte iha prosesu dezenvolvimentu nasionál.
Entretantu, tuir dadus ne’e fundasaun KODIVA rejista totál komunidade LGBTI+ ejiste iha fundasaun nia laran hamutuk 2000-resin ne’e mak namkari iha territóriu nasionál.
Notísia relevante: LGBTI Barak Lahatene Sira Nia Moris
Jornalista: Abílio Elo Nini
Editór: Evaristo Soares Martins
