Komunidade aldeia Natardik moris iha nakukun laran
COVALIMA, 25 jullu 2023 (TATOLI)–Komunidade aldeia Natardik, suku Dato Tolu, postu administrativu Fohorem, munisípiu Covalima, Eduardo Benjamin Loro, hateten komunidade iha suku Dato Tolu seidauk asesu eletrisidade no moris iha nakukun laran.
“Ami komunidade suku Dato Tolu, aldeia Natardik hahú tempu okupasaun Indonezia to’o Timor-Leste ukun aan tinan 20-resin ona, maibé ami kontinua sei moris iha nakukun laran,” Komunidade Eduardo Benjamin Loro hateten ba Agência Tatoli iha aldeia Natardik, tersa ne’e.
Ho kondisaun refere, lori komunidade uza solár panel maibé bainhira udan monu rai ne’e komunidade sunu de’it lilin no lampu tradisionál tanba tempu udan solár panel la funsiona (lakan).
Nia hateten, aleinde komunidade la asesu estrisidasidade, komunidade mós seidauk asesu estrada nune’e difikulta komunidade atu lorin sira-nia produtu lokál ba faan iha merkadu.
“Ami seidauk asesu estrada no eletrisidade, nune’e komunidade seidauk sente ukun rasik aan. Ho razaun katak, komunidade aldeia Natardik la asesu estrada no eletrisidade iha tempu okupasaun indonezia to’o ohin loron,” nia dehan.
Ho problema ne’e, komunidade husu ba IX Governu Konstitusionál atu dada liña eletrisidade no hadi’a Estrada, tanba tinan 20-resin ona maibé povu seidauk sente ukun rasik aan ho loloos.
Profesór Francisco da Silva reforsa, ho kondisaun seidauk asesu eletrisidade mak difikulta nós ba profesór atu prepara matéria ba estudante sira.
“Kalan ami labele prepara matéria atu hanorin estudante sira tanba ami seidauk asesu eletrisidade. Provizóriu ami uza de’it solár panel ne’ebé depende de’it ba loromatan, se bainhira tempu udan mak solár panel la lakan no ami iha nakukun laran de’it,” nia dehan.
Tuir dadus, populasaun iha suku Dato Tolu, postu administrativu Fohorem, munisípiu Covalima ne’e ho totál populasaun hamutuk 1.600-resin ne’ebé hela namkari iha aldeia Fatuk Kabuar Leten, Fatuk Kabuar Kraik ne’ebé asesu ona eletrisidade no aldeia Natardik seidauk asesu eletrisidade.
Jornalista : Celestina Teles
Editór : Cancio Ximenes
