Ministériu Edukasaun diskute manuál lisensiamentu ba estabelesimentu eskolár
DILI, 25 jullu 2023 (TATOLI) – Ekipa téknika husi Ministériu Edukasaun (ME) diskute manuál lisensiamentu ne’ebé regula estabelesimentu eskolár iha Timor Leste.
Koordenadór Gabinete Lisensiamentu Akreditasaun no Avaliasaun Estatístika Edukativa, Maurício José Martins, informa katak ba ema ne’ebé maka iha vontade atu loke eskola tenke kumpre manuál ida ne’e.
“Ha’u hakarak dehan manuál lisensiamentu ne’e importante loos hodi regula eskola sira iha ita-nian rain. Sé de’it maka hakarak harii eskola tenke tuir no kumpre padraun lisensiamentu ne’ebé maka hahú diskute daudaun”, Mauricio Martins dehan iha Salaun Nobre Ian Martin, Balide, ohin.
Responsavel ne’e esplika manuál ne’e rasik atu fó dalan hodi reforsa lei sira ne’ebé maka estabelese ona iha Ministériu Edukasaun, nune’e bele fó kompeténsia ba kada diresaun sira atu akompaña prosesu dezenvolvimentu edukasaun iha país.
“Manuál ne’e atu fó biban ba ita-nian diresaun sira atu iha kbiit foti desizaun ruma karik ema ruma loke eskola la kumpre regulamentu estabelesidu. Manuál ne’e sei sai giaun ida atu hatudu dalan ba kada diresaun sira atu uza sira-nian papél iha desizaun ruma”, afirma.
Nia esplika katak manuál ne’e atu simplifika inskrisaun husi lei sira ho padraun lisensiamentu depois sei gia ema hotu ne’ebé maka hola parte iha prosesu lisensiamentu.
Iha prosesu diskusaun téknika ne’e kompostu husi diretór servisu edukasaun munisipál, inspetór eskolár, diresaun-jerál edukasaun ensinu no diresaun eskola téknika sira hodi diskute matéria ne’ebé haree husi padraun prinsipál no operasionál.
Ba padraun prinsipál nian maka sei halo aprezentasaun kona-ba ezbosu manuál, haree kona-ba sistematizasaun no armonizasaun lei sira atu regula serbisu Gabinete Lisensiamentu Akreditasaun no Avaliasaun Estatístika nian inklui traballu sira kada diresaun. Sei diskute mós padraun operasionál nian kona-ba distribuisaun tarefa no responsabilidade kada diresaun, hahú husi gabinte lisensiamentu, inspesaun jerál, diresaun servisu munisipál, eskola no parte ne’ebé maka atu kria estabelesimentu eskolár.
“Manuál ida ne’e sei fó kompeténsia ba ema botu ne’ebé iha relasaun ho prosesu konstrusaun edukasaun iha Timor-Leste atu hatene ida-idak nia devér no obrigasaun, nune’e labele hamosu dezentendimentu iha futuru”, salienta.
Diskusaun ba manuál lisensiamentu ne’e sei realiza entre 25 no 28 jullu. Rezultadu husi diskusaun ne’e sei relata ba Ministra Edukasaun no Sekretáriu Estadu atu tau iha konsiderasaun.
Jornalista: Tomé Amado
Editora: Maria Auxiliadora
