PNTL-DTTC Covalima monta sinál tránzitu iha auto estrada
COVALIMA, 25 jullu 2023 (TATOLI)–Polísia Nasionál Timor-Leste (PNTL), Dirasaun Transporte Terrestre no Komunikasaun (DTTC, sihla portugés) hamutuk ho Servisu Munisipál Obra Públika (SMOP) Covalima monta sinál tránzitu iha auto estrada suku Labarai, postu Suai entre suku Belekasak, postu Maucatar tanba Estrada monu.
“Ami tau ideia hamutuk, ohin, ita tau sinál tránzitu sira-ne’e hodi fó hanoin ba ita-nia sidadaun-sira, tanba relasiona ho akontese dezastre naturál halo auto estrada monu. Sinál tranzitu ne’e fó atensaun ba sidadaun sira no motorist transporte públiku no privadu ba-mai labele hetan asidente,” Komandante PNTL munisípiu Covalima, Superintendente Polísia Calisto Gonzaga, hateten ba jornalista sira, tersa ne’e.
Nia hatutan, auto estrada ne’ebé monu fó perigu ba sidadaun-sira nia vida ne’ebé halo movimentu ho transporte públiku no privadu liuhosi auto estrada iha tempu kalan, liuliu ba sidadaun hosi nasionál la akompaña kondisaun auto Estrada, nune’e bele hamosu asidénte ruma.
Nia hateten, auto estrada hanesan patrimóniu Estadu nian nune’e atu garante seguransa la’ós polísia mesak de’it maibé mós autoridade sira iha munisípiu Covalima.
Komadante PNTL ne’e mós husu sidadaun sira-ne’ebé hala’o viajen iha tempu kalan tenke kuidadu hodi fó atensaun ba sinál emerjénsia ne’ebé monta ona, iha auto estrada nune’e sidadaun sira vaijen ho seguru no husu sidadaun sira labele sobu sinál ne’ebé monta ona iha iha auto estrada lori ba uma.
Diretór Transporte Terrestre no Komunikasaun munisípiu Covalima, Joaquim Gusmão, hateten Dirasaun Transporte Terrestre no Komunikasaun hamutuk Polísia Nasionál Timor-Leste hodi monta sinál tránzitu hanesan parte ida atu fó atensaun ba sidadaun sira, nune’e labele hamosu dezastre.
Tuir observasaun hosi jornalista Agência Tatoli nota katak, iha terrenu daudaun ne’e transporte públiku no privadu hala’o movimentu liuhosi auto estrada, ho razaun ponte Rai Ketan iha suku Labarai, postu suai entre suku Belekasak, postu Maucatar kotu, tanba impaktu hosi dezastre naturál.
Jornalista : Celestina Teles
Editór : Cancio Ximenes
