PPN-IRI diskute haforsa demokrasia iha Timor-Leste
DILI, 25 jullu 2023 (TATOLI)—Prezidente Parlamentu Nasionál (PPN), Maria Fernanda Lay, tersa ne’e, simu audénsia ho Resident Program Director hosi International Republican Institute (IRI), Dianna Margaret James, diskute kona-ba kooperasaun serbisu atu haforsa liután demokrasia iha Timor-Leste.
“Ohin, ami ko’alia liuliu tambá IRI serbisu iha área haforsa demokrasia, entaun ami hakarak rona liuliu husi Prezidente Parlamentu Nasionál saida mak nia hanoin, oinsá IRI fó nia apoiu di’ak liután ba iha membru Parlamentu sira. Liuliu mós atu harii relasaun no halo rede serbisu ne’ebé mak di’ak liután bele apoiu ita nia membru Parlamentu,” Resident Program Director IRI, Dianna Margaret James, hateten ba jornalista sira hafoin ramata enkontru iha PN.
Nia dehan, ohin diskute kona-ba programa sira ne’ebé haforsa demokrasia saida mak IRI bele halo, hanesan agora IRI prepara semináriu ida atu hala’o ho membru Parlamentu Nasionál sira no saida mak IRI halo di’ak liután ba membru PN.
IRI mós iha programa ida bolu ‘Ko’alia Ba Hau’ hanesan programa televizaun oinsá bele envolve membru Parlamenru Nasionál (PN) sira.
Iha soru mutu ne’e PPN sente kontente no pozitivu tebes ho programa ne’ebé IRI iha atu hala’o no enkoraja IRI atu serbisu besik-liu ho komisaun espesializada sira iha PN, tanba liuliu programa televizaun asuntu espesífiku sira atu ko’alia ba komisaun sira.
IRI nia prezensa iha Timor-Leste desde tinan 2000 to’o agora, hala’o ona serbisu liu-liu iha haforsa demokrasia.
Jornalista : Nelson de Sousa
Editór : Cancio Ximenes
