iklan

NASIONÁL, EKONOMIA, HEADLINE

Empreza Vico Construction planeia hahú konstrusaun Marina Square iha outubru 2023

Empreza Vico Construction planeia hahú konstrusaun Marina Square iha outubru 2023

Serimónia hatuur fatuk dahuluk ba konstrusaun Marina Square Dili iha antiga rezidénsia saudozu Francisco Xavier do Amaral, Bidau Lecidere, tersa (30/03/2022). Imajen Tatoli/Egas Cristóvão

DILI, 26 jullu 2023 (TATOLI)Empreza Vico Construction hosi nasaun Xina ne’ebé sai manán-na’in planeia hahú implementa projetu Marina Square iha outubru 2023.

“Agora sira sei fura bee-moos ho naruk metru 60, tanba bee-moos ne’e la’ós de’it presiza ba konstrusaun maibé mós ba oin bainhira projetu ne’e ramata ona, dala-ruma sei hotu iha fulan-agostu mai, depois iha loron 18 agostu sira ninia materiál hosi rai-li’ur to’o iha Dili,” Jestór Projetu empreza Vico Construction, John Zhao Shi Cai, informa ba Agência Tatoli, iha ninia knaar fatin, Bidau Lecidere, kuarta ne’e.

Empreza iha fulan-setembru sei foku sosa materiál lokál hanesan fatuk, rai-henek no seluk-tan, nune’e iha outubru sira hahú ona servisu.

“Ami hasoru difikuldade hodi identifika kualidade rai-henek no fatuk,” nia akresenta.

Notísia relevante : Governu no empreza hatuur fatuk dahuluk ba konstrusaun Marina Square

Timor-oan ne’ebé sei servisu iha faze dahuluk hamutuk 100, enkuantu sidadaun estranjeiru na’in-180 mai hosi Xina, Índia no Srilanka.

Governu no empreza hatuur fatuk dahuluk konstrusaun Marina Square iha loron 17 maiu 2022, ne’ebé lansa hosi antigu Primeiru Ministru, Taur Matan Ruak.

Área konstrusaun lokaliza iha antiga rezidénsia saudozu Francisco Xavier do Amaral, Bidau Lecidere.

Empreza Timor Marina Square, S.A, orijen hosi nasaun Singapura hanesan responsável projetu, ne’ebé tau prioridade investimentu iha setór turizmu hodi realiza investimentu ho kapitál investimentu millaun $50.

Projetu ne’e, sei kria empregu 170 imediatu no bainhira realiza obra konstrusaun durante faze operasionál sei kria empregu 250 ne’ebé liga diretamente ba projetu.

Aleinde ne’e, sei loke oportunidade empregu foun no negósiu sira hodi hamosu vaga servisu iha transporte, komérsiu, lojístika no tékniku no finanseiru sira.

Nune’e, iha mós oportunidade foun ba formasaun no kapasitasaun institusionál, ne’ebé uza prátika di’ak liu ba atendimentu no servisu internasionál, sei hasa’e padraun no nível kualidade iha oferta indústria oteleira Timor-Leste.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!