Eskola RFF 1,2 Aitoun ameasadu atu monu difikulta prosesu aprendizajen
COVALIMA, 26 jullu 2023 (TATOLI)–Eskola Bázika Filiál (EBF) 1,2 Aitoun ne’ebé lokaliza iha aldeia Aitoun, suku Fatululik, postu administrativu Fatululik, munisípiu Covalima ameasadu atu monu ne’e difikulta prosesu aprendizajen ba estudante sira iha tempu udan.
“Ami sente triste ho kondisaun ami nia eskola bainhira iha tempu udan monu-rai difikulta ami hala’o prosesu aprendizajen tanba kondisaun eskola kakuluk kuak no didin sira mós atu monu ona no halo bee nalihun iha sala-de-aula sai tahu no eskola ameasa atu monu,” Estudante Dezalia Lizia Vong dos Santos, hateten ba ba Agência Tatoli, iha resintu eskola Filiál Aitoun, kuarta ne’e.
Ho kondisaun eskola refere estudante EBF 1,2 Aitoun husu ba Governu liuhosi Ministériu Edukasuan Juventude no Desportu (MEJD) atu haree kondisaun eskola, tanba kondisaun eskola la favoravél atu hala’o prosesu aprendizajen.
Koordenadór Eskola Bázika Filiál 1,2 Aitoun, Francisco da Costa Bere, hateten kondisaun eskola Bázika Filiál 1,2 Aitoun estudante sira la seguru atu hala’o prosesu aprendizajen, tanba bainhira iha tempu udan monu-rai halo bee nalihun iha sala-de-aula laran no konstrusaun eskola ameasa atu monu.
“Ami-nia eskola ida-ne’e ameasa atu monu ona tanba impkatu hosi dezastre naturál no estudante sira laiha fatin atu halimar, tanba ambiénte eskola ladún faboravél ba estudante sira atu halimár, nune’e bainhira intervalu estudante sira halimár de’it iha sala-de-aula laran tanba resintu eskola nakonu ho tahu,” nia hateten.
La seguru tanba kondisaun eskola ne’ebé didin ho bebak hahú kuak, dodook, uma kakuluk mós kuak no ameasa atu monu ona, nune’e halo estundate sira la seguru ona tanba sala-de-aula haree hanesan ema halai natar.
Ho kondisaun eskola ne’e, nu’udar koordenadór hato’o hela de’it proposta ba ministériu relevante maibé to’o ohin loron laiha resposta.
Eskola Bázika Filiál 1.2 Aitoun iha suku Fatululik ho nia profesór na’in-hitu (7) kompostu hosi profesór permanente na’in-tolu (3), kontratadu na’in-tolu (3) ho profesór volontátiu na’in-ida (1), ho total estundate hamutuk na’in-82.
Jornalista : Celestina Teles
Editór : Cancio Ximenes
