DILI, 26 jullu 2023 (TATOLI) – Xefe Departementu Emerjénsia iha Hospital Nasionál Guidu Valadares (HNGV) Eldegar Lopes, dehan iha fulan juñu liubá ospitál rejista moras ho tipu oioin hamutuk 5,105, hosi númeru ne’e, pasiente na’in-12 mak mate iha sala emerjénsia ho kondisaun grave.
“Fulan jullu nian, ami seidauk bele fó sai maibé iha juñu nian, ita konsege rejista pasiente hamutuk 5,105 ne’ebé mak baixa iha Hospital Nasionál ne’e, sira ne’e ho tipu moras ne’ebé la hanesan, hosi númeru sira ne’e ema hamutuk na’in-12 mak mate iha sala emerjénsia, na’in ualu mak mate ona iha uma foin lori ba emerjénsia maibé ita konta hotu hamutuk ema na’in 20 mak mate”, Eldegar dehan ba Agência TATOLI iha HNGV, kuarta ne’e.
Nia dehan, númeru pasiente ne’ebé ho asidente motor ho kanek Kaman no todan hamutuk 179, asidente hosi kareta 19, pasiente ne’ebé kauza hosi violénsia doméstika hamutuk hitu.
Pasiente hirak ne’ebé sofre hosi violénsia sosiál iha dalan hanesan ema taa hamutuk na’in-10, tuda na’in-tolu no ema baku hamutuk na’in-ida no ema sona malu hamutuk na’in-tolu kompostu hosi rama ambon, nune’e pasiente na’in-tolu tenta atu oho aan na’in-tolu ne’ebé hemu ratsung.
Eldegar akresenta, pasiente ne’ebé baixa iha maternidade liuhosi emerjénsia hamutuk 616, pasiente ne’ebé baixa iha medisina interna hamutuk 367, baixa iha sirujia hamutuk 111, baixa iha pediatria hamutuk 177, baixa iha pernatolojia hamutuk 52 no pasiente ho moras mentál ne’ebé baixa iha HNGV na’in-ida.
Nune’e hosi kazu sira ne’e hotu pasiente hirak ne’ebé ba halo observasaun iha sala emerjénsia hamutuk 1194, pasiente ne’ebé baixa iha sala emerjénsia la to’o loron ida alta kedan hamutuk 2262, pasiente alta pedidu hamutuk 27.
“Ema sira husu alta pedidu mak hanesan mai fase ran no moras grave seluk balu maibé família la fó sira ba buka fali ai-moruk tradisionál, hanesan ema sira asidente tohar lakohi halo tratamentu maibé ba buka fali ai-moruk tradisionál ida ne’e mak bolu alta pedidu”, nia esplika.
Hosi kazu sira hotu, HNGV halo kategoria mean ne’ebé kondisaun grave doutor tenke haree lalais iha fulan juñu hamutuk 749, kategoria kinur signifika moras hela maibé laiha risku ba vida 1715 no ikus liu ho kategoria modok ba pasiente hirak ne’ebé transfere hosi postu saúde sira ne’ebé moras kaman 2681.
Fasilidade iha sala emerjénsia sufisiente
Kona-ba fasilidade hodi halo tratamentu ba pasiente sira iha sala emerjénsia, nia hatan daudaun ne’e sufisiente hela ba doutór sira hodi halo tratamentu ba pasiente.
“Fasilidade iha sala emerjénsia fasilidade sufisiente hela, hanesan kama ba pasiente sira iha hela, osijéniu mós agora ne’e kapas tebes, stock out ai-moruk fulan hira ba kotuk mak menus maibé agora daudaun ita buka meiu ona bele ona halo atendimentu”, nia konklui.
Jornalista: Hortencio Sanchez
Editór : Zezito Silva
