DILI, 26 jullu 2023 (TATOLI) – Komisaun B ne’ebé trata asuntu Negósiu Estranjeiru, Defeza Seguransa halo vizita kortezia dahukuk ba Kuartel Jenerál, FALINTIL-Forsa Defeza Timor-Leste (F-FDTL) hodi hasoru malu Xefe Estadu Maiór Jenerál F-FDTL Tanente Jenerál Domingos Raul Falur Rate Laek ho Xefe Estadu Maiór Jerál Forsa Armanda (XEMJFA) Koronél José da Costa Soares ‘Trix’, hodi hato’o preokupasaun oinsá Komisaun B fó prioridade ba bem estar forsa armada, infraestrutura militár inklui manutensaun ba viatura sira.
“Ohin enkontru ho Komisaun B, ami koalia kona-ba ami-nia difikuldade instituisaun F-FDTL nian, liuliu bem estar forsa armada, infraestrura militár no manutensaun transporte ba forsa armada”, Koronél Trix hateten ba jornalista sira iha Kuartel Jenerál F-FDTL Fatuhada, kuarta ne’e.
Nia dehan, ba pontu hirak ne’e importante tebes ba instituisaun militár tanba kuandu atu halo servisu, ida ne’e sai nesesidade tanba ne’e Parlamentu tenke tau atensaun ba ida ne’e.
“Bem estar forsa nian ida ne’e mós importante ba institusaun F-FDTL inklui infraestrutura tanba forsa armada atu halo servisu presiza akomoda sira iha fatin ida. Ami tinan ida liubá ami aumenta rekrutamentu forsa tenke aumenta mós infraestrutura”, Trix afirma.
Hatan kona-ba ida ne’e, Prezidente Komisaun B, Domingos Agusto ‘Deker’, hateten vizita kortezia mai iha Kuartel Jerál F-FDTL ne’e programa no planu asaun parlamentu nia hanesan Deputadu ba komisaun B ne’ebé trata ba asuntu Defeza no Seguransa iha planu 2023 halo vizita kortezia ba Defeza hodi rona preokupasaun no difikuldade husi instituisaun F-FDTL nian.
Nia dehan, hanesan Prezidente Komisaun B ne’ebé foin halao kna’ar iha lejislatura da neen, sei anota preokupasaun sira ne’e no husu ba Komandu F-FDTL atu hatama iha programa no planu orsamentu molok aprezenta ba Parlamentu.
“Ita hotu hatene katak iha instituisaun F-FDTL iha difikuldade barak, hanesan infraestutura, hela fatin ba forsa armada, viatura no seluk tán, maibé entre difikuldade sira ne’e ami husu ona ba Komandu atu define iha planu Governu nian molok aprezenta ba Palamentu iha ne’ebá mak ita sei haree“, Deker afirma.
“Agora ami labele koalia tanba ami mós ema foun no liga ba forsa ne’e sensitivu tanba ne’e ami seidauk bele koalia buat ida”, nia konklui.
Jornalista; Natalino Costa
Editór : Zezito Silva
