COVALIMA, 26 jullu 2023 (TATOLI)–Komandante PNTL Sesaun Tránzitu Seguransa Rodoviáriu, Inspetór Asistente Patricio de Jesus, hateten hahú janeiru to’o jullu tinan 2023 ne’e polísia tránzitu Covalima kontribui ona reseita $12.009 ba kofre Estadu.
“PNTL sesaun tránzitu kontribui reseita ne’e mai hosi fonte sidadaun sira-ne’ebé viola lei kódigu estrada hanesan karreta sira uza reben, motorizada sira laiha asesoria kompletu hanesan laiha espellu, balun uza motorizada kanu-resin mak polísia tranzitu prende, nune’e infratór sira selu iha banku hodi kontribui reseita ba kofre Estadu,” Inpetór Asistente, Patricio de Jesus, hateten ba jornalista sira iha komandu PNTL Covalima, Santa Rosa, kuarta ne’e.
Reseita ba kofre Estadu ne’e, mai hosi infratór hamutuk ema na’in-566 ne’ebé fahe ba karreta hamutuk-65, motorizada 473, asidente hamutuk 11, haruka ba tribunál ida no sei iha prosesu nia laran.
Nia mós husu motorista ne’ebé uza transporte públiku no privadu tenke kumpre regra kódigu tránzitu nune’e evita akontese asidénte no insidénte.
Polísia Tránzitu Covalima mós halo apreensaun ba motorizada sira-ne’ebé seidauk rejistu tuir artigu 111 hakerek veukulu seidauk rejistu ka laiha dokumentu sei selu mínimu $60 másimu 300,” nia hateten.
Tuir dadus, motorizada ne’ebé laiha dokumentu hamutuk 10-resin, nune’e PNTL liuhosi sesaun tránzitu fó tempu ba infratór sira durante loron 90 bainhira la foti sei entrega ba tribunál.
Jornalista : Celestina Teles
Editór : Cancio Ximenes
