BAUCAU, 26 jullu 2023 (TATOLI) – Fundasaun Uma Paz munisípiu Baucau deteta kazu ema soe bebé tanba fatór rede sosiál ne’ebé kontribui ba joven sira livre halo relasaun seksuál.
Diretora Ezekutiva Fundasaun Uma Paz Baucau, Felismina Belo, esplika, maioria joven sira liuliu estudante barak liu halo kontaktu liuhosi mídia sosial hanesan facebook no whatsapp sein iha kuiñesementu loloos kona-ba ema-ne’ebé halo kontaktu.
“Mídia sosiál sai fukun ida atu lori sira ba risku nune’e futuru labarik sira laiha responsabilidade ba aan-rasik,” nia informa ba Agência TATOLI iha Vila Nova, kuarta ne’e.
Fatór rede sosiál kontribui tanba laiha limitasaun ba utilizadór sira atu halo kontaktu ho ema ne’ebé maioria identidade la klaru, ikus mai mosu kazu labele deteta tanba indentidade rede sosiál taka bainhira mosu ona kazu.
Maioria estudante minoridade uza telemovél nune’e barak-liu halo kontaktu ho ema sein kontrola hosi inan-aman liuliu bainhira iha oras eskola.
Alende ne’e, fatór kultura hanesan umane labele iha relasaun domin ho feto-san ne’ebé sai presaun hodi ikus-mai soe bebé, fatór edukasaun família kontribui mós ba kazu soe bebé tanba inan-aman la fó atensaun ba oan feto sira.
Kauza seluk fatór ekonomia tanba maioria labarik sira la kuida isin-lolon nune’e utiliza sai lukru ekonomia ba aan-rasik
“Parte estadu no NGO sira presiza aprosima liuliu serbisu hamutuk ho Inan-aman sira,” Felismina Belo akresenta.
Maioria inan-aman husik abandona oan feto sira nune’e sai oportunidade atu livre halo asaun sein koñesementu kona-ba edukasaun seksuál hodi hamosu kazu soe bebé.
Esforsu Uma Paz hasoru dezafiu bainhira hasoru inan-aman sira bainhira sosializa kona-ba edukasaun sívika ligadu ho relasaun tanba laiha kolaborsaun másimu hosi sosiedade iha terrenu.
Alende ne’e, iha eskola manorin nain-sira ladun fó prioridade ba atividade hosi Uma Paz tanba limita estudante sira atu partisipa liuliu oras la sufisiente.
Uma paz produs ona livru manuál nu’udar matéria hodi sosializa iha terrenu hanesan hadomi, respeita no relasaun ho totál modula hitu ne’ebé uza hodi sosializa ba estudante sira iha kada eskola.
Fundasaun Uma Paz rasik durante tinan-2023 rejista kazu hamutuk 130, komposta hosi violénsia doméstika, abuzu seksuál, abandona no insestu hosi munisípiu tolu hanesan Lautém, Baucau no Manatuto.
Jornalista : Natalino Belo
Editór : Evaristo Soares Martins
