BAUCAU, 26 jullu 2023 (TATOLI) – Fundasaun Uma Paz munisípiu Baucau kontinua apoia morál ba suspeitu inisiál AB ne’ebé soe bebé iha aldeia Lutumutu, suku Tirilolo, postu Baucau vila.
Diretora ezekutiva fundasaun uma paz Baucau, Felismina Belo, esplika, fundasaun hamutuk ho rede referál Baucau, PRADET, Polísia Nasionál Timor-Leste (PNTL) no ALFELA hodi fó rekomendasaun liuhosi konferénsia ligadu ho kazu refere tanba suspeitu minoridade 14 ba 15 anos nune’e presiza iha protesaun.
“Inan hosi bebé alende katégoria nu’udar suspeitu nu’udar mos vítima entaun futuru ami hamutuk ho rede hotu sei apoia tuir ami-nia parte bazea lei ne’ebé vigór,” Diretór Fundasaun Uma Paz Baucau informa ba Agênsia TATOLI iha vila nova, kuarta ne’e.
Felismina Belo argumenta, apoia ne’ebé fó ba vítima tuir knaar no funsaun Uma paz nian no la halo intervensaun ba prosesu justisa ne’ebé sei prosesa tuir lei liuhosi Ministériu Públiku (MP).
Uma Paz nia apioa direita ba labarik bebé hanesan fatin inklui nesesidade báziku maibé bebé ne’ebé antes ne’e soe hakotu ona iis iha loron-sabdu, 22 jullu.
“Labarik feto sira presiza apoia nafatin no labele moe atu ko’alia tanba idade kiik presiza atensaun hosi inan-aman,” Felismina Belo akresenta.
Antes ne’e, PNTL kaptura Inan hosi bebé feto iha área Watulete, Vila Nova iha loron-sesta, 21 jullu ho inisiál AB idade 15 nu’udar estudante.
Rezultadu primeiru instánsia hosi Tribunál Distritál Baucau fó sai suspeitu hetan Termu Identidade Rezidénsia (TIR) tanba alende suspeitu nu’udar mos vítima nune’e hein kontinuasaun prosesu investigasaun.
Entretantu bebé feto ne’ebé AB soe hakotu iss iha loron-22 jullu mesmu halo taratamentu intensivu iha Ospitál Rejionál Eduardo Ximenes (HorEX, sigla portugés) munisípiu Baucau.
Bebé feto ne’ebé AB so’e hakotu moris ho kondisaun menus hosi normál ka seidauk to’o tempu atu partu nune’e labele salva mesmu esforsu ona hosi profisionál saúde sira.
Kazu soe bebé akontese iha loron-18 fulan jullu iha área Waituni, bairru Uatulete, aldeia Lutumutu, suku Tirilolo hafoin hetan hosi Andri Marcel Belo Casameta idade 12 purvolta oras 17:30 lokraik.
Fundasaun Uma Paz rasik durante tinan-2023 rejista kazu hamutuk 130, komposta hosi violénsia doméstika, abuzu seksuál, abandona no insestu hosi munisípiu tolu hanesan Lautém, Baucau no Manatuto.
Jornalista : Natalino Belo
Editór : Evaristo Soares Martins
