Floresta Covalima kontribui reseita $5.067.50 ba kofre estadu
COVALIMA, 27 jullu 2023 (TATOLI) – Xefi Departamentu Reprezentasaun Territóriál Floresta Planta no Indústria Covalima, Francisco Sarmento hateten, hahú hosi fulan-janeiru to’o juñu tinan 2023 ne’e Floresta Covalima kontribui ona reseita $5.067.50 ba kofre estadu.
“Bazeia ba dadus ne’ebé ami iha hahú husi fulan-janeiru to’o juñu tinan 2023 ne’e, ami kontribui ona reseita $5.067.50 ba kofre estadu ne’ebé reseita tama husi negosiánte sira ne’ebe hasai lisensa hodi halo negósiu,” Francisco Sarmento dehan ba jornalista sira iha nia servisu fatin, Kampung-baru, kinta ne’e.
Nia isplika, reseita ne’ebe Floresta Covalima kontribui mai husi negosiánte ne’ebé hasai lisensa negósiu hodi koa ai ne’ebé kada kúbiku-ida selu $25.00 hodi selu direta iha Banku Nasionál Komérsiu Timor-Leste (BNCTL). Ne’ebé maioria koa ai teka ho volume metru kúbiku 202,70.
Aleinde Floresta hasai lisensa negósiu ba negósiante ,Floresta Covalima mós hasai lisensa ho tipu lisensa uza sosiál hodi konstrui uma hela fatin no uma adat ho espesiál ai hanesan ai- teka, Gemelina, kafira, Ru, We, karui, kakeu, lelefuik, ketimun, mame, Roti, lese, bubur, siba, samatuku no ai na ho totál metru kúbiku hamutuk 871,84.
Munisípiu Covalima iha nia postu administrativu sira hanesan Fatululik, Fatumea, Fohorem, Maucatar, Zumalai, Suai no Tilomar ne’ebé maioria koa ai hodi halo negósiu no lisensa uzu sosiál.
Jornalista: Celestina Teles
Editór : Armandina Moniz
